Расія: горш, чым у крызісным 2008 годзе

Такіх кепскіх паказчыкаў у расійскай эканоміцы не было нават у крызісным 2008 годзе.



Фота: Lori


Скарачэнне рэальных даходаў расіян працягваецца: у кастрычніку рэальная зарплата сярэдняга работніка паменшылася на 10,9%. Гэта ўсё больш негатыўна ўплывае на раздробны гандаль і шэраг галін прамысловасці.

Такая выснова вынікае з апублікаванага Мінэканамразвіцця маніторынгу бягучай сітуацыі ў эканоміцы Расіі па выніках студзеня-кастрычніка 2015 года, паведамляе РБК.

У Мінэканамразвіцця адзначылі, што сцісканне спажывецкага попыту і ўсё больш актыўны пераход насельніцтва на ашчадную мадэль паводзінаў прывялі да рэзкага падзення абароту рознічнага гандлю.

Па выніках кастрычніка ён скараціўся ў гадавым вымярэнні адразу на 11,7%, што стала горшым вынікам за апошнія 20 гадоў.

Пры гэтым продажы нехарчовых тавараў, на якіх людзі эканомяць у першую чаргу, знізіліся адразу на 12,5%.

Адмова ўсё большай колькасці расіян купляць тавары «не першай неабходнасці» цягне за сабой скарачэнне аб'ёмаў вытворчасці ў найбольш залежных ад спажывецкага попыту галінах прамысловасці. Так, напрыклад, вытворчасць паліто ў Расіі скарацілася на 18%, трыкатажу — на 19,3%, гарнітураў — на 19,8%. У цэлым за студзень-кастрычніка 2015 г аб'ёмы вытворчасці адзення ў Расіі скараціліся ў гадавым вылічэнні на 22,6%. Вытворчасць абутку скарацілася за год на 16,3%

«Падзенне вытворчасці практычна на чвэрць аб'ёму, за адпаведны перыяд 2014 года, абумоўлена тым фактарам, што адзенне, якая адносіцца да сярэдняй цэнавай катэгорыі, практычна ўсё шыецца з імпартных тканін, кошт якіх значна ўзрос з-за росту курсу долара», — адзначае Мінэканамразвіцця

Значнае скарачэнне вытворчасці зазнала не толькі лёгкая прамысловасць. У справаздачы Мінэканамразвіцця адным з «галоўных аўтсайдэраў» расійскай эканомікі называецца машынабудаванне. У прыватнасці, вытворчасць легкавых аўтамабіляў у кастрычніку 2015 года скарацілася ў Расіі на 11,4%, грузавікоў — на 2%.

Аб'ём платных паслуг скараціўся ў кастрычніку 2015 г. у гадавым вылічэнні на 2,9%. Расіяне сталі радзей карыстацца грамадскім транспартам, радзей выязджаць за мяжу на адпачынак і часцей эканоміць на паслугах сувязі.

Дадаткова абвастрае сітуацыю рост беспрацоўя. Па выніках кастрычніка працэнт беспрацоўных у Расіі дасягнуў 5,6% эканамічна актыўнага насельніцтва. Пры гэтым найбольш высокі ўзровень беспрацоўя назіраўся сярод людзей ва ўзросце да 19 гадоў (30,3%), а таксама тых, каму цяпер ад 20 да 24 гадоў (15,3%).

Даследчы холдынг «Рамір» адзначыў пагаршэнне сітуацыі на расійскім рынку працы: па шэрагу паказчыкаў становішча спраў у лістападзе 2015 года горшае, чым у крызісным 2008 годзе. Напрыклад, восенню 2015 г. са скарачэннем штатаў сутыкнуліся работнікі 39% расійскіх кампаній, таксама ў многіх працоўных знізілася зарплата: скарачэнне заробкаў зафіксаваныя ў кожнай чацвёртай (26%) расійскай кампаніі, у кожнай дзясятай (11%) зрэзалі або цалкам адмянілі сацпакет, паведамляе «Рамір».

Каментаваць