Patryjoty 1200 100 2e1c7308a3a48a13db21bf292e831989ae0299303b01379966627b13afde24a1

100-я ўгодкі БНР прапануецца адзначыць на дзяржаўным узроўні

З такой ініцыятывай на З'ездзе беларусаў свету выступіў былы міністр замежных спраў Беларусі Пётр Краўчанка.

Былы міністр замежных спраў Беларусі Пётр Краўчанка прапанаваў у 2018 годзе на дзяржаўным узроўні адзначыць 100-годдзе абвяшчэння Беларускай Народнай Рэспублікі.

Такую прапанову выказаў Краўчанка 15 ліпеня ў Мінску на VII З'ездзе беларусаў свету ў прысутнасці цяперашняга кіраўніка МЗС Уладзіміра Макея, пішуць naviny.by.

Краўчанка нагадаў, што яшчэ ў 1992 годзе ён выказаў ідэю стварэння нацыянальнага пантэона. На яго думку, сёння «няма ніякіх перашкод, каб пачаць афіцыйнае абмеркаванне стварэння такога пантэона» на ўзроўні дзяржавы.

«Можа, хопіць самадзейнасці, і мы створым дзяржаўную праграму па пошуку Францыска Скарыны? — задаўся пытаннем былы кіраўнік беларускай дыпламатыі. — Можа быць, у рэшце рэшт, мы зразумеем, што цудоўная падзея, якую мы адзначалі ў снежні 2016 года — 95-ю гадавіну народнага камісарыята замежных спраў БССР, мы паступова маглі б трансфармаваць у 100-годдзе Міністэрства замежных спраў БНР?»

«Усе гэтыя людзі — Язэп Мамонька, Вацлаў Ластоўскі, Усевалад Фальскі, Алесь Чарвякоў — гэта патрыёты. Адны пайшлі з Захада, нацыянал-камуністы — з Усхода, але яны проста рознымі шляхамі спрабавалі стварыць Беларусь. Іх радніць тое, што яны былі знішчаны сістэмай, смерць іх пагадніла», — дадаў ён.

Краўчанка лічыць, што прымірыць іх на ўзроўні афіцыйнай гістарыяграфіі можна было б, афіцыйна адзначыўшы 100-я ўгодкі БНР у 2018 годзе год і векавы юбілей стварэння БССР — у 2019-м.

«Ніякіх перашкод гэтаму я не бачу. БНР і БССР — гэта з'явы аднаго коран», — падкрэсліў экс-кіраўнік МЗС.

 


Каментаваць