Бацька загінулай маладзечанскай школьніцы патрабуе спецыяльнага расследавання

Бацька 13-гадовай школьніцы, якая загінула пад Маладзечна падчас прыборкі бульбы, патрабуе спецыяльнага расследавання гэтага інцыдэнту. З адпаведнай заявай Алег Папчэня звярнуўся да начальніка Маладзечанскага міжраённага аддзела Мінскага абласнога ўпраўлення дэпартамента дзяржаўнай інспекцыі працы Мінпрацы і сацабароны.

Фота: Следчы камітэт

Фота: Следчы камітэт


Трагічнае здарэнне адбылося 29 верасня падчас выканання сельскагаспадарчых працаў у СВК «Усход-агра»: вучаніца 8-га класа сярэдняй школы № 11 Маладзечна, 13-гадовая Вікторыя загінула пад коламі грузавіка. На месцы здарэння працавала следча-аператыўная група. Маладзечанскім раённым аддзелам Следчага камітэта распачата справа паводле ч. 2 арт. 317 КК (парушэнне правілаў дарожнага руху і эксплуатацыі транспартных сродкаў, што пацягнула па неасцярожнасці смерць чалавека).

Як паведаміў БелаПАН гомельскі праваабаронца, прававы інспектар незалежнага прафсаюзу РЭП Леанід Судаленка, які дапамог бацьку загінулай скласці заяву, наймальнік дапусціў дзіця да выканання забароненай працы. Апроч таго, наймальнік быў абавязаны запатрабаваць медыцынскае заключэнне аб стане здароўя і прызнанні дзіцяці прыдатным да выканання сельгасработ, звязаных з перамяшчэннем цяжараў ўручную і ўзняццем цяжараў на вышыню, а таксама правесці з дзіцем ўводны інструктаж па ахове працы і тэхніцы бяспекі падчас выканання работ і прызначыць адказнага за бяспеку дзіцяці на сельскагаспадарчай вытворчасці. Таксама наймальнік павінен быў застрахаваць дзіця ад няшчасных выпадкаў на вытворчасці, звязаным у тым ліку з эксплуатацыяй машын.

Вікторыя была адзіным дзіцем у сям'і. На поле з класам быў нават не класны кіраўнік, а іншы настаўнік. Яе бацька супраць таго, каб былі пакараныя кіроўца і настаўнікі, а настойвае на пакаранні тых, хто накіраваў туды дзяцей.

Як адзначыў Судаленка, бацька загінулай дзяўчынкі заявіў, што «не хоча жыць за кошт свайго дзіцяці», але пагадзіўся падпісаць заяву. «Калі будзе пачата спецыяльнае расследаванне, сям'і належаць выплаты. Аднаразовая — 12 сярэднямесячных заробкаў па гаспадарцы, гэта каля 3,6 тысяч рублёў новымі. Таксама ён можа запатрабаваць кампенсацыю маральнай шкоды ў суме каля 20 тысяч рублёў. Таксама ў генеральным пагадненні ёсць норма аб выплаце 10 сярэднегадавых заробкаў, гэта значыць каля 36 тыс. рублёў. У суме сваякам рэальна атрымаць каля 60 тыс. рублёў», — патлумачыў прававы інспектар.

Паводле яго слоў, аднаразовую выплату павінен вырабляць «Белдзяржстрах», кампенсацыю маральнай шкоды — СВК, па генпагадненні — таксама працадаўца. «Аднак для ўсяго гэтага патрэбны акт формы Н-1 аб тым, што няшчасны выпадак вытворчы, без яго ніякіх выплат не будзе. І для гэтага трэба спецрасследаванне дэпартамента па працы», — растлумачыў Леанід Судаленка.


Паводле euroradio.fm

Каментаваць