Patryjoty 1200 100 2e1c7308a3a48a13db21bf292e831989ae0299303b01379966627b13afde24a1

Блогер Філіповіч на волі

Гомельскага блогера Максіма Філіповіча вызвалілі пасля 25 сутак арышту.

Пра гэта паведамілі ў Савецкім РАУС Гомеля сябрам, якія прыйшлі яго сустрэць. Супрацоўнікі міліцыі сказалі, што Максім пайшоў дахаты пешкі. У РАУС яго прывезлі з ізалятара часовага ўтрымання (ІЧУ).

Сябры сустрэлі Максіма па дарозе з РАУСа.

Максім Філіповіч расказаў, што з ізалятара яго адвезлі ў РАУС. Блогер паведаміў, што на яго складзены пратакол за ўдзел у акцыі ў Пінску. «Не разумею, што мне будзе інкрымінавана? Я прыехаў у Пінск. Там нікога ня ведаў. Вельмі мала людзей. Думаў зняць з вышыні, знайшоў кропку. Зняў. Ідзе мужчына з дачкой, кажа: „Прывет, зорка!“. Раблю некалькі крокаў, як тры амбалы мяне ламаюць. Яны мяне заломваюць, цягнуць. „Хто вы такія? — пытаюся. — Пасьведчанні вашы?“ Я крычаў некалькі разоў, каб яны назваліся. Я пачаў крычаць: „Народ!“ Я зваліўся з ног, альбо мяне збілі. У мяне пасля гэтага былі гематомы, якія я зафіксаваў. Мяне пачалі цягнуць па плітцы, народ пачаў бегчы. Яны кінулі мяне на плітку і збеглі. Людзі мяне акружылі, падхапілі, падышлі журналісты. І там больш нічога не было. Мяне праводзілі, і я паехаў. Чаго хочуць, ня ведаю. Справу накіравалі ў Пінск. Позвы не было, калі суд — невядома», — сказаў Максім Філіповіч.

Максім дадаў, што ў гомельскім ізалятары было шмат людзей, якіх абвінавацілі ва ўдзеле ў акцыі.

«У ізалятары было ўсё добра. З начальнікам два разы размаўлялі. Адрамантавалі радыё, слухалі радыё ФМ. Нешта чуў, нечага ня чуў».

На пытанне, як кармілі ў ізалятары, Максім адказаў: «Ежа — 50 на 50. Прывозяць са сталоўкі. Бывае класна, капуста наварыстая. А бывае такое, што проста кашмар. Усё залежыць ад змены».

Максім сказаў, што лісты, апроч чатырох, якія аддалі раней, ён атрымаў, калі выходзіў з ізалятара.


31 сакавіка блогер павінен быў выйсці на свабоду. Каля будынка ІЧУ яго чакалі жонка, маці і сябры. Але дзяжурны ІЧУ паведаміў, што Філіповічу дабавілі яшчэ 7 сутак арышту — за ўдзел у «Маршы недармаедаў» у Маладэчне. Пазней высветлілася, што адміністрацыйную справу за ўдзел у мітынгу ў Маладэчне разглядаў 29 сакавіка суд Савецкага раёну Гомля. Суддзя Алена Шайн пакарала блогера арыштам на сем сутак.

svaboda.org

Каментаваць