Patryjoty 1200 100 2e1c7308a3a48a13db21bf292e831989ae0299303b01379966627b13afde24a1

Гродна. Скончыліся раскопкі на Вялікай Траецкай

Археалагічныя працы, якія ладзіліся сіламі гістфаку ГрДУ, падышлі да канца. Самай цікавай знаходкай аказаўся развал печы XІV–XVI стагоддзя, агулам жа гродзенцы ўпадабалі гэты раён яшчэ ў ХІ ст.



Археалагічныя працы, якія ладзіліся сіламі гістфаку ГрДУ, падышлі да канца. Самай цікавай знаходкай аказаўся развал печы XІV–XVI стагоддзя, агулам жа гродзенцы ўпадабалі гэты раён яшчэ ў ХІ ст.

Знаходкі даюць археолагам падставы меркаваць, што яшчэ ў ХІ стагоддзі на гэтым месцы знаходзіўся гарадскі пасад   на гэты факт ўказваюць фрагменты тагачаснага посуду. Каментуе загадчык кафедры археалогіі і этнаграфіі ГрДУ Сяргей Піваварчык:
 
— Падчас раскопак у нас атрымалася зафіксаваць тры будаўнічых ярусы, самы ранні з якіх адносіцца да ХІІ–ХІІІ стагоддзя, самы позні датуецца XVI стагоддзем. Разам з тым былі знойдзеныя тры развалы печаў, адна з якіх з'яўляецца вельмі для нас цікавай, бо была складзеная з гаршчковай кафлі — самай ранняй на беларускіх землях, якая выкарыстоўвалася ў XІV–XVI ст. З яе атрымалася сабраць нават цэлыя формы.
 
Большасць знаходак прадстаўляе керамічны посуд розных часоў ды кафлю. Знаходкі яшчэ не апрацоўваліся і грунтоўна не аналізаваліся, таму дакладнейшыя звесткі нас чакаюць пасля.
 
Бліжэйшым часам мы плануем пачаць раскопкі ў двары Гуманітарнага каледжу, дзе будзе стварацца музей. Калі там будуць выяўленыя нейкія падмуркі ці драўляныя пабудовы дырэкцыяй разглядаецца нават варыянт аб іх кансервацыі і выкарыстоўванні ў якасці «міні-скансэну». Плануецца таксама працяг даследаванняў Каложскай царквы, але час іх правядзення залежыць ад тэрмінаў пераносу ўнутранага інтэр'еру ў новы царкоўна-прыхадскі комплекс.

Паводле сайта “Твой стыль
 

Каментаваць