КПЧ ААН заклікае Мінск прыцягнуць вінаватых па справе Саннікава да крымінальнай адказнасці

Улады Беларусі парушылі правы былога кандыдата ў прэзідэнты Андрэя Саннікава. Такое рашэнне прыняў Камітэт ААН, куды Саннікаў падаў скаргу яшчэ ў 2012 годзе.

ААН паведамляе, што сябры Камітэту прызналі, што Андрэй Саннікаў стаў ахвярай незаконнага пазбаўлення волі, былі парушаныя яго правы на прыватнае жыццё, свабоду выказвання думак і на мірныя сходы. Падчас турэмнага зняволення ён падврягаўся катаванням ды іншым відам жорсткага абыходжання.

У заяве камітэту адзначаецца, што права на мірныя сходы з'яўляецца адным з асноўных правоў чалавека і важнай умовай існавання дэмакратычнага грамадства: гэта права прадугледжвае магчымасць арганізоўваць мірныя сходы ў грамадскіх месцах, нават без папярэджання, і ўдзельнічаць у іх.

Сябры Камітэту заклікалі Мінск правесці дбайнае бесстаронняе расследаванне абвінавачванняў у катаваннях і прыцягнуць вінаватых да крымінальнай адказнасці. Яны таксама заявілі пра неабходнасць пагасіць судзімасць Саннікава і даць яму кампенсацыю. Беларусь павінна таксама прыняць захады дзеля папярэджання падобных парушэнняў. Эксперты са шкадаваннем адзначылі што, нягледзячы на абавязак краінаў супрацоўнічаць з Камітэтам, Беларусь не ўзяла ніякага ўдзелу ў разглядзе справы Саннікава.

Андрэй Саннікаў быў арыштаваны ў 2010 годзе, калі ўлады жорстка разагналі дэманстрацыі пратэстаў у сувязі з выбарамі прэзідэнта. Ён быў кандыдатам ад апазіцыі і атрымаў пяць гадоў турмы праз абвінавачанне ў арганізацыі «масавых беспарадкаў». Пасля ён быў памілаваны прэзідэнтам, аднак не мае права балатавацца ў будучыні, паколькі ягоная судзімасць не была пагашаная.

spring96.org



Хочаце ведаць больш? Сачыце за нашымі публікацыямі ў Telegram і Facebook!

Каментаваць