Літва пацвердзіла затрыманне высокапастаўленага супрацоўніка МУС Беларусі

Генеральная пракуратура Літвы пацвердзіла факт затрымання на літоўска-беларускай мяжы высокапастаўленага супрацоўніка беларускіх праваахоўных органаў і яго жонкі. У паведамленні Генпракуратуры імёны затрыманых не называюцца, яны пазначаныя ініцыяламі Д.К. (чыноўнік) і А.К. (яго жонка).



Партал навінаў Delfi.lt са спасылкай на Генпракуратуру Літвы паведамляе, што затрыманы начальнік упраўлення Следчага камітэта па Мінску Дзмітрый Канаплянік і яго жонка.

У паведамленні Генпракуратуры гаворыцца, што ўсталяваныя асобы двух грамадзян Беларусі, якія былі затрыманыя 21 верасня на літоўскай-беларускай мяжы ў сувязі з тым, што ў іх аўтамабілі Honda CR-V былі выяўленыя некалькі дзясяткаў патронаў калібра 9 мм Luger. «Аб затрыманні дваіх грамадзян ва ўстаноўленым парадку была інфармавана амбасада Беларусі ў Вільні і неадкладна задаволеная просьба амбасады аб сустрэчы з затрыманым Д.К.», — адзначае Генпракуратура.

Як патлумачыла БелаПАН начальнік аддзела камунікацый Генпракуратуры Літвы Алена Марціноніне, у паведамленні пазначаны толькі ініцыялы затрыманых, бо ў ведамстве прытрымліваюцца правіла аб невыдаванні асабістых дадзеных. «Я не ведаю, чаму ў сваёй інфармацыі журналісты, называючы прозвішча затрыманага, спасылаюцца на Генпракуратуру, са мной яны не звязваліся. Я толькі магу пацвердзіць, што ініцыялы Д.К. і А.К. пазначаны правільна. Мужчына, па нашых дадзеных, з’яўляецца высокапастаўленым начальнікам праваахоўных органаў вашай краіны», — адзначыла яна.

Па словах Марціноніне, па заканчэнні 48 гадзін і ўсталявання асобы затрыманыя былі адпушчаныя з-пад варты. «Як толькі адпала патрэба ўтрымліваць іх пад вартай, было прынята рашэнне аб іншай меры стрымання, якая не дазваляе ім пакінуць Літву. Асабістыя дакументы ў іх забралі», — паведаміла прадстаўнік літоўскай Генпракуратуры.

Паводле яе слоў, беларусы падазраюцца ў кантрабандзе боепрыпасаў для агнястрэльнай зброі. Дасудовае расследаванне праводзіць крымінальная мытная служба, кантралюе гэты працэс пракуратура Вільнюса. Па літоўскаму заканадаўству за падобнае злачынства прадугледжана пакаранне ад 3 да 10 гадоў пазбаўлення волі.

Раней у МЗС Беларусі пацвердзіў факт затрымання беларусаў. «Мы пацвярджаем, што двое беларускіх грамадзян былі затрыманыя пры перасячэнні літоўска-беларускай мяжы. У цяперашні час пасольства Рэспублікі Беларусь у Літве займаецца высвятленнем ўсіх абставінаў затрымання», — гаворыцца ў паведамленні МЗС ад 23 верасня.

Начальнік аддзела інфармацыі і сувязі з грамадскасцю цэнтральнага апарата Следчага камітэта Беларусі Сяргей Кабаковіч не пацвердзіў і не абверг інфармацыю аб затрыманні Дзмітрыя Канапляніка. «Усё, што магу сказаць, што ў цяперашні час ён знаходзіцца ў адпачынку», — сказаў Кабаковіч БелаПАН.

Хочаце ведаць больш? Сачыце за нашымі публікацыямі ў Telegram і Facebook!

Каментаваць