Назіральнай камісіі перакрылі доступ да палітвязняў: сустрэцца з Жамчужным не ўдалося

Адміністрацыя Горацкай ПК №9 не дала грамадскай назіральнай камісіі пры галоўным упраўленні юстыцыі Магаблвыканкама сустрэцца з палітвязнем Міхаілам Жамчужным. 

Пра гэта паведамляе праваабарончы сайт mspring.online.

Раней дырэктар беларускага Дома правоў чалавека Таццяна Равяка звярнулася ў рэгіянальную і рэспубліканскую ГНК з просьбай праверыць Горацкую ПК №9, дзе ўтрымліваецца Жамчужны, паколькі ўбачыла пагрозу яго жыццю і здароўю. Па яе інфармацыі, 24 студзеня мужчыну жорстка збіў іншы асуджаны.

13 сакавіка Магілёўская абласная камісія сумесна з рэспубліканскай пры Міністэрстве юстыцыі праверыла, у якіх умовах утрымліваюцца зняволеныя ПК №9. Зрэшты, падыходы ў дзвюх ГНК былі розныя, распавёў прадстаўнік рэгіянальнай камісіі, праваабаронца Барыс Бухель:

— Рэспубліканская камісія ставілася да нас некалькі напружана. Калі мы з маёй калегай Таццянай Казлоўскай адзначалі ў нататніках ўсе моманты, то яны, склалася адчуванне, проста хадзілі і глядзелі. У моманты, калі я прасіў адміністрацыю калоніі дазволіць сустрэчу з Жамчужным, рэспубліканская ГНК заўжды ўставала на яе бок. Узначальвала яе член Савета Рэспублікі Таццяна Краўчанка, — распавёў Бухель.

Яму і старшыні абласной камісіі Таццяне Казлоўскай не выдзелілі нават транспарт, каб дабрацца да Горак. Каб адрэагаваць на скаргу пра пагрозу жыцця зняволенага, праблемы давялося вырашаць прыватным спосабам.

— Нам былі не радыя. Галоўнай нашай мэтай было сустрэцца з палітвязнем Міхаілам Жамчужным, аднак у калоніі зрабілі ўсё, каб гэтага не адбылося. Ён у дадзены момант знаходзіцца ў штрафным ізалятары. Нам адмовіліся паказваць камеры ШІЗА, паказалі толькі адно памяшканне камернага тыпу. Там рэжым крыху мякчэй, чым у ШІЗА. Калі я паўторна спытаў пра Жамчужнага, рэакцыя адміністрацыі была жорсткай: не — і ўсё, — паведаміў праваабаронца.

Адміністрацыя калоніі заявіла, што паўнамоцтваў у назіральнай камісіі пры Магілёўскім аблвыканкаме на асабістую сустрэчу са зняволеным няма.

Рэспубліканскай ГНК планавалася таксама анкетаванне іншых зняволеных, аднак прайшло яно непразрыста:

 Рэспубліканская камісія напачатку візіту аддала анкеты адміністрацыі калоніі, а ў канцы візіту ў яе ж і сабрала. Наколькі можна верыць дадзеным з анкет — вялікае пытанне, — збянтэжаны Бухель.

Зрэшты, адну скаргу ад зняволенага члены камісіі пачулі:

— У памяшканні камернага тыпу, куды нас дапусцілі, знаходзіліся тры чалавекі. Двое з іх казалі, што ўсё адпавядае нарматывам, а трэці паскардзіўся на ўчарашнюю адсутнасць гарачай вады ў лазні, холад у камеры — дзьме са шчыліны закрытага вакна і ўчора была недастаткова цёплая батарэя, а сёння яна гарачэй, і таму ў камеры прыкметна цяплей, фортку адчынілі. Прадстаўнікі адміністрацыі гэта ўсё адмаўлялі, спаслаўшыся на тое, што зняволены проста пакрыўджаны і спрабуе адыграцца, — распавёў Бухель.

Са станоўчых момантаў праваабаронца адзначыў якасць ежы, а таксама адсутнасць пераліміта зняволеных у калоніі.

Нядопуск да Міхаіла Жамчужнага — гэта ўжо другі выпадак, калі грамадскай назіральнай камісіі не даюць сустрэцца з палітвязнем. Раней ГНК не далі наведаць Дзмітрыя Паліенку ў бабруйскай ПК №2.

 spring96.org



Хочаце ведаць больш? Сачыце за нашымі публікацыямі ў Telegram і Facebook!

Абмеркаванне:

  • Дмитрий
  • 2018-03-21 23:51:49
Автор всерьез думает, что все граждане знают аббревиатуры колоний, судов, тюрем, комиссий?

Каментаваць