Парфянкоў піў гарбату з Парашэнкам (відэа)

Нядаўні беларускі палітвязень Васіль Парфянкоў, які зараз бароніць незалежнасць Украіны са зброяй у руках, узгадвае, як напрыканцы 2004 году піў гарбату з Пятром Парашэнкам і як быў асуджаны да 3 гадоў зняволення украінскім судом за супраціў міліцыі.

З Украінай у Васіля Парфянкова доўгія і асаблівыя стасункі. У 2004-м ён адзін з першых беларусаў прыехаў на Майдан і узняў там бел-чырвона-белы сцяг. Ён з некалькімі беларусамі стаяў у пікетах, ахоўваў намёты пратэстоўцаў, бараніў людзей ад правакацый цітушак.

У прамежак паміж 2-bм турам прэзідэнцкіх выбараў і трэцім турам (так званымі перавыбарамі) Васіль з паплечнікамі захапілі офіс ПР, які стаўся апірышчам для правакатараў і цітушак, якія тэрарызавалі насельнікаў намётавага мястэчка. Выбівалі “захопнікаў” з дапамогай украінскага спецназа “Альфа”. За супраціў міліцыі хлопцаў асудзілі на 3 гады зняволення. Ужо тады Васіль спазнаў вялікую хвалю салідарнасці з боку простых украінцаў.

Васіль Парфянкоў таксама ў гутарцы на відэа ўзгадвае сваё знаёмства з Пятром Парашэнкам, які тады быў у штабе кандыдата ў прэзідэнты Віктара Юшчанкі. Парашэнка пачаставаў беларусаў гарбатай з цукеркамі і падзякаваў за дапамогу украінскаму народу ў змаганні за праўду і справядлівасць.

Нагадаем, Васіль Парфянкоў быў удзельнікам Плошчы-2010, асуджаны да 4 гадоў пазбаўлення волі, але ўжо ў жніўні 2011 быў памілаваны. Пазнейшае зняволенне Васіля Парфянкова ў калёніі ў Горках было звязанае з парушэннем прэвентыўнага нагляду, якое замацоўвалася за ім пасля вызвалення з турмы. Васіль выйшаў на свабоду напачатку снежня 2014 года. Праз некалькі дзён былы палітвязень з’ехаў ва Украіну. Цяпер ён ваюе за незалежную Украіну  ў складзе добраахвотніцкага батальёна Арганізацыі ўкраінскіх нацыяналістаў.

Запіс быў зроблены пасля вызвалення Парфянкова, напачатку снежня 2014 года.

Каментаваць