Patryjoty 1200 100 2e1c7308a3a48a13db21bf292e831989ae0299303b01379966627b13afde24a1

Подпісы за адстаўку міністра абароны накіраваныя ў АП, Саўмін, МА і ў парламент

Скончаны збор подпісаў пад петыцыяй за спыненне свавольства ў войску і адстаўку міністра абароны Андрэя Раўкова на сайце Zvarot.by. Патрабаванні, вылучаныя ў дакуменце, падтрымалі 9614 чалавек.
«Адсеялі 500 не да канца запоўненых і «фэйкавых» анкеты, і яшчэ столькі ж дубляў. На Petitions.by збор працягваецца яшчэ чатыры дні», — распавядае Еўрарадыё адзін з аўтараў дакумента, грамадскі актывіст і праваабаронца Андрэй Стрыжак.

Петыцыя накіраваная ў Адміністрацыю прэзідэнта, Савет міністраў, Міністэрства абароны і Палату прадстаўнікоў. «Па законе, ва ўсіх згаданых вышэй суб'ектаў ёсць 30 дзён на тое, каб даць нам адказ на наш зварот», — дадае Стрыжак.

Петыцыя была складзеная пасля таго, як стала вядома пра жахлівыя абставіны гібелі салдата тэрміновай службы Аляксандра Коржыча ў ваеннай часці ў Печах. Ногі 21-гадовага радавога былі звязаныя, на галаву нацягнутая майка.

Следчы камітэт пацвердзіў амаль усё, што Коржыч распавядаў сваякам і сябрам пра дзедаўшчыну ў сваёй часці: у яго адабралі банкаўскую карту, за карыстанне тэлефонам прымушалі плаціць. Сяржанты рэгулярна атрымлівалі «даніну» цыгарэтамі і прадуктамі харчавання, а кіраўнікі роты, дзе служыў Саша, ведалі пра гэта ўсё, але глядзелі скрозь пальцы.


Паводле euroradio.fm

Каментаваць