Роберт Костра: ахвяры з Беларускага катынскага спісу забіты менавіта ў Курапатах

У польскім грамадстве існуе меркаванне, што ахвяры з Беларускага катынскага спісу забіты менавіта ў Курапатах. Пра гэта 7 кастрычніка ў Мінску заявіў дырэктар Музея гісторыі Польшчы (Варшава) Роберт Костра на сустрэчы з беларускімі журналістамі ў рэдакцыі газеты “Народная Воля” з нагоды адкрыцця выставы “Ян Карскі. Чалавек свабоды”.



На здымку Роберт Костра на сустрэчы з беларускімі журналістамі ў рэдакцыі “Народнай Волі”


Адказваючы на пытанне НЧ, спадар Роберт Костра патлумачыў  меркаванне польскага грамадства, між іншым, і тым, што менавіта ў Курапатах — у гэтым найбольш буйным месце расстрэлаў ахвяраў сталінізму ў Беларусі і хаваецца таямніца забойства каля чатырох тысяч польскіх афіцэраў з Беларускага катынскага спісу. Аднак каб пацвердзіць гэтае меркаванне, якое склалася на грунце ўскосных фактаў, неабходна правесці археалагічныя даследаванні, бо іншых прамых доказаў, у тым ліку і архіўных, на жаль, пакуль не знойдзена, сказаў дырэктар Музею гісторыі Польшчы.  

Трэба мець на ўвазе, што згодна паведамлення Польскага радыё, 8 чэрвеня Курапаты наведаў сакратар Рады па ахове памяці змагання і пакутніцтва (Rada Ochrony Pamiкci Walk i Mкczeсstwa — дзяржаўная арганізацыя Польшчы, якая займаецца ўшанаваннем памяці пра гістарычныя падзеі, што ўвасабляюць “змаганне і пакутніцтва польскага народу”), прафесар Анджэй Кунерт.

Ён назваў Курапаты “чарговым вялізным трагічным лёсам ў гісторыі Польшчы” і, што  “найбольш верагодна, апошнім недастаючым месцам для спаўнення абавязку Рэчы Паспалітай па пайменным ушанаванні і для пабудовы апошніх Катынскіх могілак”. Як падкрэсліў спадар Анджэй Кунерт, “ёсць істотная пэўнасць”, што менавіта ў Курапатах можа ляжаць дагэтуль нязнойдзеная частка забітых польскіх афіцэраў – ахвяраў Катыні. Пры гэтым сакратар Рады па ахове памяці змагання і пакутніцтва адзначыў, што па дамоўленасцях з беларускім бокам трэба будзе прайсці ўсе неабходныя працэдуры, звязаныя з эксгумацыяй і ідэнтыфікацыяй, а таксама з узвядзеннем помніка.

А згодна інфармацыі прэсавай службы МЗС Польшчы, пад час сустрэчы міністраў замежных справаў Беларусі і Польшчы Уладзіміра Макея і Радаслава Сікорскага, што адбылася ў Варшаве 28 жніўня, узнімалася пытанне пра магчымасць распачаць зандажна-эксгумацыйныя працы ў Курапатах, а таксама пра верагоднасць пабудовы там апошняга катынскага могільніка.

На прэсавай канферэнцыі 15 студзеня 2013 года ў адказ на пытанне журналіста Польскага радыё пра Беларускі катынскі спіс, які змяшчае імёны не менш чым 3.870 палякаў, забітых супрацоўнікамі НКУС на тэрыторыі Беларусі ў 1940 годзе, а таксама пра мажлівасць правядзення раскопак у Курапатах, галава беларускай дзяржавы заявіў наступнае:

“Плаціце грошы, калі вас нешта цікавіць. Мы ўсё правядзем і вам адкажам. Якія праблемы? Палякі не чужыя нам людзі. Заплаціце грошы —- правядзем раскопкі, дзе вы лічыце патрэбным, і адкажам на вашае пытанне. Абыдземся без польскіх спецыялістаў. У нас стае беларускіх. Мы да вас не едзем раскопкі праводзіць, і вам да нас не трэба ехаць. Нам смаленскай гісторыі было досыць. Мы самі сумленна і прынцыпова гэта зробім. Калі журналісты хочуць суправаджаць гэты працэс -- калі ласка”.

Каментаваць