Школьнікі без падручнікаў

Прайшло ўжо амаль два месяцы новага навучальнага года, але шмат якія вучні бялыніцкіх школ вымушаны займацца без падручнікаў. І гэта пры тым, што бацькі школьнікаў за іх заплацілі.

Не хапае падручнікаў нават у лепшай навучальнай установе раёна — гімназіі № 1 Бялыніч. Шмат хто з вучняў у выпускных адзінаццатых класах не мае вучэбных дапаможнікаў па рускай літаратуры, фізіцы, хіміі, беларускай мове.

Прайшло ўжо амаль два месяцы новага навучальнага года, але шмат якія вучні бялыніцкіх школ вымушаны займацца без падручнікаў. І гэта пры тым, што бацькі школьнікаў за іх заплацілі.

Не хапае падручнікаў нават у лепшай навучальнай установе раёна — гімназіі № 1 Бялыніч. Шмат хто з вучняў у выпускных адзінаццатых класах не мае вучэбных дапаможнікаў па рускай літаратуры, фізіцы, хіміі, беларускай мове.

Па словах вучаніцы 11 «А» класа гімназіі Яўгеніі, недахоп падручнікаў вельмі ўскладняе навучанне. У прыватнасці, як кажа Яўгенія, яна асабіста збіраецца здаваць выпускны экзамен за курс сярэдняй школы па беларускай мове, таксама плануе праходзіць тэсціраванне па гэтаму прадмету, а асабістага падручніка ёй у школе не далі. Таму, каб падрыхтавацца да ўрокаў, даводзіцца хадзіць да сяброўкі.

Бацька дзяўчыны кажа, што грошы за карыстанне падручнікамі ён заплаціў цалкам, і яму абсалютна не зразумела, чаму яго дачка не забяспечана ўсім неабходным для добрай вучобы.

Бракуе падручнікаў не толькі ў гімназіі № 1 Бялыніч, але і ў астатніх школах Бялыніцкага раёна — Машчаніцкай, Вішоўскай, Ланькаўскай і іншых. Як тлумачаць настаўнікі, гэта праблема ўзнікла ў сувязі з тым, што з-за рэформы і пераходу на адзінаццацігадовае навучанне розныя класы пачынаюць вывучаць прадметы ў адзін тэрмін. Так, напрыклад, раней фізіку пачыналі вывучаць з сёмага класа, зараз — з шостага і г. д.

Здзіўляе толькі адно: чаму пытанне забеспячэння дзяцей падручнікамі не вырашана да гэтага часу, хоць рэформа сістэмы адукацыі ідзе ўжо больш за год. Тым больш, што год таму на сустрэчы з выбаршчыкамі ў той жа гімназіі № 1 кандыдата ў дэпутаты Палаты прадстаўнікоў Валерыя Іванова яго давераная асоба, начальнік аддзела адукацыі Бялыніцкага райвыканкама Мікалай Пашкоўскі казаў, што з пераходам на адзінаццацігадовае навучанне ў нашым раёне ні ў вучняў, ні ў педагогаў не будзе аніякіх праблем.

Магчыма, шаноўны Мікалай Іванавіч, які, дарэчы, днямі быў узнагароджаны медалём «За працоўныя заслугі», меў на ўвазе нешта іншае, але праблемы з забеспячэннем дзяцей падручнікамі ў Бялыніцкім раёне ёсць.

Іван Барысаў

Каментаваць