Сяржант Маёранка: Мы не можам страляць у адказ

Сёння ад раніцы не спыняюцца абстрэлы Марыупаля сепаратыстамі. Шмат украінскіх жаўнераў паранена. Ёсць і звесткі (пакуль што непацверджаныя) пра двух забітых. Пра гэта паведаміў наш журналіст Зміцер Галко.



Зміцер змог паразмаўляць з адным з параненых — малодшым сяржантам 17-й танкавай брыгады Уладзімірам Маёранкам. Уладзімір і яго таварыш былі параненыя сёння каля 7-й раніцы пад Паўлапалем, самым дальнім блокпосце пад Марыупалем.

Больш за ўсё Уладзіміра абурае тое, што яны не могуць адразу стрэліць у адказ. Для таго, каб адкрыць агонь па сепаратыстах, ім спачатку трэба звярнуцца да вышэйшых камандзіраў, атрымаць ад іх дазвол і толькі пасля можна выстраліць. А тым часам сепаратысты мяняюць месца дыслакацыі і страляць ужо няма сэнсу. Уладзімір кажа, што сепаратысты пахавалі вакол зброю, прыязджаюць ледзь не на роварах, страляюць і хуценька з'язджаюць. А ўкраінскія вайскоўцы з-за неабходнасці ўзгадняць кожны стрэл, нічога не могуць з імі зрабіць.

Шмат прэтэнзій у Маёранкі і да вайсковай выведкі. "Мы нічога не ведаем пра сепаратыстаў, а яны пра нас ведаюць шмат, таму ў нас столькі стратаў", — скардзіцца Уладзімір.

Дарэчы, Уладзімір паранены лёгка (аскепкамі ў нагу), а вось яго таварыш зараз у вельмі цяжкім стане ў аперацыйнай. Лекары спрабуюць выратаваць яму жыццё.

Марыупаль абстрэльваюць сёння ўвесь дзень. Шмат параненых украінскіх вайскоўцаў прывезлі ў шпіталі горада.

А тым часам Пётр Парашэнка сёння на прэс-канферэнцыі ў Кіеве заявіў: «Упершыню за доўгі час сёння ноччу ніводны ўкраінскі вайсковец не быў паранены, ніхто не быў забіты. Вы не можаце ўявіць, якое гэта выдатнае пачуццё».

Хочаце ведаць больш? Сачыце за нашымі публікацыямі ў Telegram і Facebook!

Каментаваць