Традыцыйнае памінанне ў Курапатах

Вечарам 29 лістапада ва ўрочышчы Курапаты адбылося штомесячнае памінанне ахвяраў сталінізму, у якім пад бел-чырвона-белымі сцягамі прынялі ўдзел 4 дэмакратычных актывісты.



Лістападаўскія Курапаты


Яны запалілі знічкі, правялі малебен, хвілінай маўчання ўшанавалі памяць бязвінна закатаваных ахвяраў сталінізму, праспявалі песні беларускага нацыянальнага Адраджэння.

Як зазначыла сябра КХП-БНФ, нязменны сцяганосец ушанаванняў Ніна Багінская, “з сябрамі кожны месяц прыходжу ў Курапаты, таму што ўлада не жадае памятаць сваіх рэпрэсаваных суайчыннікаў”. “І мы будзем прыходзіць да таго часу, пакуль ўлада не прызнае сталінскі генацыд, што адбываўся на беларускай зямлі. І колькі б нас ні было ў Курапатах, мы будзем шанаваць сваіх продкаў і незалежнасць Бацькаўшчыны. Бо ў Курапатах загінулі людзі, якія імкнуліся набыць незалежнасць Беларусі ад Маскоўскай імперскай дзяржавы”, — заявіла Ніна Багінская.

Затым яна прачытала верш выбітнага беларускага паэта, дзяржаўнага і грамадскага дзеяча Генадзя Бураўкіна “Малітва“:

“Мы здалёку ўбачылі свабоду

I яшчэ не вырваліся з пут...

Божа,

Нe дабаў майму народу

Пошасці,

Няпраўды

I пакут.

У чужым нялюдскім землятрусе

Хіба ў нечым мелі мы віну?..

Божа,

Адвядзі ад Беларусі

Здраду,

Вераломства

I вайну.

Смутнаю парою нелюдзімай,

Калі ўсе наўкол ідзе на злом,

Божа,

Захіні маю Радзіму

Мудрасцю,

Спакоем

I цяплом!”

Грамадская актывістка Алена Засценчык — выкладчыца фізікі. І хоць сама па нацыянальнасці руская, аднак свядома па-беларуску размаўляе са сваімі вучнямі і выступае супраць палітыкі кіраўніцтва Расіі, якое імкнецца аднавіць Расійскую імперыю ў яе былых межах. Вось чаму спадарыня Алена часцяком наведвае Курапаты, каб разам з іншымі грамадзянамі Беларусі розных нацыянальнасцяў засведчыць сваю грамадзянскую пазіцыю.

Удзельнікі ўшанавання

Дарэчы, 10 гадоў таму у Курапатах быў усталявана так званы “Габрэйскі камень” — першы экуменічны памятны знак на Беларусі. На гэтым знаку, што зроблены ў адпаведнасці з габрэйскімі традыцыямі і глядзіць на Ерусалім, высечаны тэкст па-беларуску і на іўрыце наступнага зместу: ”Нашым адзінаверцам – іўдзеям, братам на Кнізе – хрысціянам і мусульманам – ахвярам сталінізму ад беларускіх габрэяў”.

“Габрэйскі камень” ва ўрочышчы

Апроч гэтага, на камяні — выявы габрэйскім сімвалаў — магендовіда і меноры, якія цягам 4 000 гадоў пакутаў і змагання вядуць габрэйскі народ да мары пра справядлівае жыццё паміж людзьмі і этнасамі. Цікава, што мемарыяльны знак зроблены з паліраванага граніту — часткі пастаменту помніка Іосіфу Сталіну, які цягам васьмі гадоў узвышаўся на Цэнтральнай (зараз — Кастрычніцкай) плошчы Мінска да 3 лістапада 1961 года, пакуль не быў поўнасцю дэмантаваны за адну ноч.

За ўдзельнікамі ўшанавання ў Курапатах наглядалі пяць міліцыянтаў.

Чарговае памінанне адбудзецца ва ўрочышчы 29 снежня а 18.00.

Фота аўтара

Каментаваць