У Брэсце ўлады забаранілі пікет супраць пераследу на "Граніце" сябраў незалежнага прафсаюза

Брэсцкі гарвыканкам забараніў пікет супраць пераследу на РУВП "Граніт" (Мікашэвічы, Брэсцкая вобласць) сябраў незалежнага прафсаюза.

Заяўку на правядзенне гэтай акцыі 7 сакавіка каля сцэны ў парку Воінаў-інтэрнацыяналістаў, які вызначаны ўладамі для такіх мерапрыемстваў, падавала намеснік старшыні незалежнага прафсаюза радыёэлектроннай прамысловасці (РЭП) і кіраўнік брэсцкага рэгіянальнага аддзялення прафсаюза РЭП Зінаіда Міхнюк. Запланаваная колькасць удзельнікаў двухгадзіннага пікета — да 50 чалавек.

Брэсцкі гарвыканкам забараніў пікет супраць пераследу на РУВП "Граніт" (Мікашэвічы, Брэсцкая вобласць) сябраў незалежнага прафсаюза.

Заяўку на правядзенне гэтай акцыі 7 сакавіка каля сцэны ў парку Воінаў-інтэрнацыяналістаў, які вызначаны ўладамі для такіх мерапрыемстваў, падавала намеснік старшыні незалежнага прафсаюза радыёэлектроннай прамысловасці (РЭП) і кіраўнік брэсцкага рэгіянальнага аддзялення прафсаюза РЭП Зінаіда Міхнюк. Запланаваная колькасць удзельнікаў двухгадзіннага пікета — да 50 чалавек.

"Мэта акцыі — праінфармаваць грамадскасць пра сітуацыю, што склалася на "Граніце" ў сувязі са стварэннем пярвічнай ячэйкі незалежнага прафсаюза на гэтым прадпрыемстве, пра націск на рабочых з боку адміністрацыі, таксама запатрабаваць аднаўлення на працы звольненага, як мы лічым, з-за надуманых прычын кіраўніка пярвічкі Алега Стахаевіча", — паведаміла БелаПАН Міхнюк.

Паводле яе слоў, пікет забаронены ўладамі, бо не заключаны дагаворы з органамі ўнутраных спраў, установай аховы здароўя і камунальным прадпрыемствам, што прадугледжана рашэннем Брэсцкага гарвыканкама ад 30 чэрвеня 2011 года "Аб масавых мерапрыемствах у горадзе Брэсце".

"У нашым горадзе не ўпершыню адмаўляюць у правядзенні пікетаў з такой матывоўкай. Пры гэтым усе спробы заяўнікаў мерапрыемстваў заключыць неабходныя дагаворы былі беспаспяховымі. У названых структурах не ведаюць, як гэта рабіць. Складаецца ўражанне, што ўлады спецыяльна ўнеслі гэта патрабаванне ў сваё рашэнне, каб не дапускаць у рэгіёне пратэстных акцый", — заявіла Міхнюк.

Яна адзначыла, што 5 сакавіка група актывістаў брэсцкага рэгіянальнага аддзялення прафсаюза РЭП сустрэлася ў Мікашэвічах з сябрамі пярвічнай ячэйкі незалежнага прафсаюза "Граніта". "Мы выказалі ім сваю падтрымку, абмеркавалі сітуацыю і расказалі, што ўжо праходзілі праз падобнае, калі стваралі сваю арганізацыю", — сказала Міхнюк.

Прафсаюзны лідар нагадала, што 6 лютага савет прафсаюзнага актыву брэсцкага рэгіянальнага аддзялення прафсаюза РЭП прыняў заяву, у якой выказаў салідарнасць з сябрамі пярвічнай арганізацыі Беларускага незалежнага прафсаюза работнікаў "Граніта", запатрабаваў ад кіраўніцтва прадпрыемства неадкладна даць юрыдычны адрас для рэгістрацыі арганізацыі БНП, спыніць націск і запалохванне працоўных і іх блізкіх. Гэты дакумент накіраваны на РУВП "Граніт".

У канцы снежня мінулага года больш за 200 працоўных "Граніта" выйшлі з дзейнай на прадпрыемстве афіцыйнай прафсаюзнай арганізацыі і заявілі пра намер стварыць пярвічную структуру Беларускага незалежнага прафсаюза. Для афіцыйнай рэгістрацыі ім неабходна атрымаць юрыдычны адрас, аднак адміністрацыя прадпрыемства не выдзяляе памяшкання.

У сярэдзіне лютага вадзіцель самазвала Алег Стахаевіч быў звольнены з фармулёўкай "неадпаведнасць работніка пасадзе ці працы, што выконваецца, з прычыны недастатковай кваліфікацыі". Прафсаюзны актывіст звяртаўся да кіраўніцтва прадпрыемства з просьбай перавесці яго на пасаду памочніка машыніста буравой устаноўкі з папярэднім перанавучаннем (перанавучанне ў такой сітуацыі ўваходзіць у абавязкі наймальніка), аднак у гэтым яму было адмоўлена.

Паводле БелаПАН
 

Каментаваць