Блюз, рок і фолк на фоне вернісажу

"Новы час" ужо паведамляў пра адкрыццё выставы «Avant-gARTe. Ад квадрата да аб’екта». Падзея такога маштабу не абмяжоўваецца толькі знаёмствам з панарамай сучаснага выяўленчага мастацтва.



Андрэй Плесанаў — акорд за акордам


У яе праграме сустрэчы з маладымі і сталымі мастакамі — удзельнікамі выставы, і прэс-канферэнцыі, і аўтограф-сесіі…

Адной з падзеяў выставы «Avant-gARTe. Ад квадрата да аб’екта» стаў unplugged-канцэрт аднаго з удзельнікаў выставы, мастака і музыканта, лідара гурта P.L.A.N. Андрэя Плясанава. Бадай, упершыню адрэстаўраванае памяшканне выставачнага комплексу адчула і ўспрыняла рытмы року і блюзу. І гэта выставачнай зале, так бы мовіць, «спадабалася» — гук атрымаўся сакавітым, а словы песень і гітарныя акорды не зліваліся ў адну каламесу.

Творы Андрэя Плясанава на выставе

Гэта дапамагло Андрэю адразу распачаць своеасаблівы дыялог з публікай і ўвайсці ў эмацыянальны кантакт са слухачамі, якія патроху ад экспанатаў выставы падыходзілі да канцэртнага подыюма. Тым больш, што распачаў А. Плясанаў свой незвычайны «выставачны» канцэрт адным са сваіх даўніх хітоў — апрацоўкай народнай песні «Шынкарачка», якая была вельмі цёпла сустрэтая слухачамі.

Беларуская мова — нязменны атрыбут твораў А.Плесанава

Сваю канцэртную праграму А. Плесанаў пабудаваў як напамін пра выданыя ім і гуртом P.L.A.N. шэсць альбомаў. Таму ім былі праспяваныя і рытм-блюзавы «Скрып-блюз», і лірычныя «Аковы кахання», і гімн жыццю паэткі-эмігранткі Н. Арсенневай «Пра вясну». Лірычная плынь ў канцэрце была працягнута хітамі гурта, якія былі ў першых радках шматлікіх беларускіх хіт-парадаў — «Легенда» (кавер на Uriah Heep), «Анна-Мар’я», «Шлях да каханай» і іншымі цудоўнымі кампазіцыямі.

Андрэй Плесанаў на фоне сваіх прац

Акрамя беларускамоўных кампазіцый, А.Плесанаў прапанаваў слухачам і рускамоўныя творы, якія яму вельмі падабаюцца. Напрыклад, песню Чыжа & кампаніі «Она не вышла замуж…» і іншыя песні з ранейшага перыяду музычнай творчасці аўтара.

Таксама вельмі цёплы быў прыняты беларускамоўны кавер Андрэя Плясанава на знакамітую песню Уладзіміра Высоцкага «Коні пераборлівыя», у якой слухачы змаглі ацаніць лексічныя і паэтычныя магчымасці роднай мовы, якой пад сілу пераасэнсаваць самыя складаныя радкі і эмоцыі класічнай рускай і славянскай паэзіі…

Гучыць твор Высоцкага па-беларуску

Ну а завяршыў Андрэй Плясанаў свой гадзінны канцэрт пад скляпеннямі выставачнага комплексу «Мінск-ЭКСПА» адным са сваіх ранейшых хітоў — кампазіцыяй «Добрай раніцы, Беларусь» («Ранішнія адчуванні»), якую ўсе прысутныя заспявалі разам.

Канешне, канцэрт мастака і музыканта Андрэя Плясанава ў «Мінск-ЭКСПА» — гэта толькі крэска да тых скарбаў, якія прадстаўлены на стэндах. Але такімі музычнымі творамі толькі ўзмацняецца вартасць такой небанальнай мастацкай падзеі, як выстаўка «Avant-gARTe. Ад квадрата да аб’екта».

Фота аўтара

Абмеркаванне:

  • Зланік
  • 2014-04-27 15:37:55
Оў, бачу на адной з карцін Андрэя Плясанава верш Вітаўта Мартыненкі, здаецца, з першага альбому гурта "P.L.A.N." Арыгінальная мастакоўская манера. Але паклоны ўсходнім
"асвабадзіцелям" у сьпевах ні к чэму. Я дык прадаў усю сваю акупанцкую песенную дыскаграфію пасьля падзеяў ва Ўкраіне.
  • Анатоль
  • 2014-04-27 16:35:17
Хто цiкавiцца.

Вiдэа з канцэрта можна паглядзець на маiм сайце:

mialguj.ucoz.org

Анатоль Мяльгуй

Каментаваць