Patryjoty 1200 100 2e1c7308a3a48a13db21bf292e831989ae0299303b01379966627b13afde24a1

Магутна і па-ірландску: кіеўскі келцік-панк гурт O'Hamsters скарыў Мінск (фота)

У клубе «Бруге» 25 лютага прайшла прэзентацыя новага альбома кіеўскага келцік-панк гурта O'Hamsters. Разам з імі выступілі: Кашлаты Box, S'N'D і «Всё_Crazy».


Яшчэ на падыходзе да клуба можна было заўважыць людзей, якія быццам толькі выйшлі з ірландскага паба: кепкі, кілты, бакенбарды.

Тых, хто спазніўся на канцэрт, чакала неспадзяванка: замест рытмаў ірландскай музыкі нечакана было пачуць скрым. Вакаліст цвердзіў: «Ненавіджу, ненавіджу, ненавіджу». Выявілася, што гэта апошняя песня гурта «Кашлаты Box». А ўвогуле яны граюць цалкам добры фолк-панк.

Гурты змяняліся на сцэне адзін за адным.

— Эм, ну так, дабрыдзень, мы прыехалі з Гародні. Цяпер вам тут трохі злабаем, — лаканічна падвёў вакаліст гурта S’n’D.

S

S'n'D


Калі да гэтага танцплац пуставаў, то зараз на яго выбеглі аж 4 чалавекі. Астатнія па кутах трэслі галовамі пад грукат скейт-панка.



На сярэдзіне выступа гурта перад лірычнай песняй пра каханне на танцпляцоўцы можна было назіраць штосьці падобнае на слэм, а дакладней штурханіну плячыма двух хлопцаў. На кароткі прамежак часу яна перарасла ў скачкі ў абдымках.

Дзеля справядлівасці варта адзначыць, што нават малая колькасць людзей на танцпляцоўцы не замінала камандзе выдатна граць свой матэрыял. А па тварах удзельнікаў было бачна, што ім самім падабаецца тое, што яны робяць.

Всё_Crazy

Всё_Crazy


З пачаткам выступу мінскага келцік-панк гурта «Всё_Crazy» ўсе ўзгадалі, дзеля чаго мы тут сёння сабраліся.

— Мы сёння сабраліся, каб павіншаваць нашых таварышаў [гурт O’Hamsters] з выпускам новага альбома. Ён атрымаўся, ну, вельмі круты! — прахрыпеў вакаліст  «Всё_Crazy».

Людзей на танцпляцоўцы паболела.

— Будзем працягваць гарэць! Як кажа адзін таварыш: «Дзе паліто, дзе што?»

На песні пра згублены чаравік хтосьці з публікі зняў уласны чаравік і пачаў танчыць на адной назе з ім у руцэ.

Далей сцэну захапілі гледачы, якія ўсе разам спявалі «На дзень святога Патрыка, які раз у годзе!» з апошняга альбому гурта «По морям».

На гэтам пазітыўным моманце вакаліст гурта «Всё_Crazy» завяршыў свой сет, запрасіўшы на сцэну галоўных герояў імпрэзы.  

Пакуль музыкі O'Hamsters рыхтаваліся да выступу, разгарачаная публіка ў розных кутках «Бруге» працягвала скандаваць радкі з песен папярэдняга гурта.  

O

O'Hamster

— Дарэчы, усім прывітанне, — павітаўся вакаліст гурта O'Hamsters. — Мы да вас 12 гадзін ехалі з Кіева!

Кіеўскі келцік панк гурт O'Hamsters існуе з 2009 года. «Где бы мы ни бывали» — гэта сёмы рэліз групы. Мінск стаў першым горадам, які пачуў новы альбом O'Hamster у межах вялікага прома-тура.


Мінская публіка добра адарвалася пад «хамякоў». Завяршыўся выступ вялікім натоўпам на сцэне, у якім усе дружна спявалі песні. І нават тое, што канцэрт быў далёка не sold out, дапамагло стварыць адчуванне, што тут усе свае.






Каментаваць