Новы альбом беларускага трыа Port Mone выдадзены ў Еўропе

Альбом «Thou» беларускага інструментальнага трыа Port Mone выдадзены буйным еўрапейскім лэйблам Hevhetia (Славакія), што спецыялізуецца на рэлізах неакласікі, джазавай ды авангарднай музыкі. Афіцыйная дата выхаду альбома — 8 верасня.



Фота Максіма Шуміліна


Запіс будзе даступны ў продажы на сэрвісеamazon.com і на афіцыйным сайце лэйбла. Новая праграма была прадстаўлена музыкамі гурта на міжнародных фестывалях «Hevhetia festival» (SK), «Integrations-Meditations Festival» (PL), «Echo Festival» (BY), «Drewniane Ucho Festival» (PL), «XV Trialoh / Krynki 2014» (PL) і высока ацэненая еўрапейскімі крытыкамі.

Уласна запіс альбома стаў полем для эксперыментаў з гукам. Удзельнікі праекта адмовіліся ад лабараторных умоваў студыі, аддаўшы перавагу натуральнай акустычнай прасторы. Студыйнае абсталяванне было перавезена ў лес, дзе і адбываўся запіс усіх кампазіцый. Такая тэхніка запісу прадыктаваная не столькі акустычнымі вымаганнямі, але ідэалогіяй самога матэрыялу, закліканага выразіць галоўную творчую місію Port Mone — зварот да нечага натуральнага, чыстага і першатворнага ў чалавечай душы, да таго, што існуе па-за сацыяльнымі ўмоўнасцямі і нормамі.

Кампазіцыі альбома скаладюць своеасаблівую карту глыбінных перажыванняў сапраўднасці ў абставінах, добра знаёмых кожнаму з нас — закаханасці, здрады, чакання, згубы, адчаю, спакою, шчасця… Мінімалістына стрыманая, але выключна шчырая музыка Port Mone добра вядомая меламанам як у Беларусі, так і па-за яе межамі.

У актыве гурта — выступы на буйнейшых міжнародных музычных фестывалях, музыка да анімацыйных, дакументальных і мастацкіх фільмаў, тэатральных пастановак. Гурт з’яўляецца актыўным удзельнікам міжнародных праектаў.

Так, у 2012 годзе быў запісаны і выдадзены “Хмелева Project” - сумесная праграма Port Mone і ўкраінскага гурта “Даха Браха”. А ў 2013 годзе па ініцыятыве ўкраінскага кінафонду імя Н.Даўжэнка музыкі ажыццявілі працу па агучванні кінафільма Мікалая Шпікоўскага “Хлеб” (Украіна, 1930) — яна стварыла фурор на міжнародных кінафестывалях (“Немые Ночи” (UA), «Pordenone silent film Festival» (IT), «Gogolfest» (UA) и  «The 5th VOICES film festival» (RU)).

Склад гурта:
Аляксей Варсоба — акардэон, Сяргей Краўчанка — перкусія,
Аляксей Ванчук — бас-гітара.

Дыскаграфія:

2009 — «DIP», CD, лэйбл «Геометрия» (RU) (узнагароджаны прызам замежных экспертаў музычнай прэміі Experty.by-2009, намінаваны на прэмію Степной Волк-2010 ў катэгорыях “Лепшы альбом” і “Музыка”) 2012 — «Хмелева Project», CD, лэйбл «Hermetyczny Garaż» (PL), агенцтвы «АртПоле» і «Наш Формат» (UA) (сумесна з «Даха Браха», узнагароджаны прызам замежных экспертаў музычнай прэміі Experty.by-2012) 2014 — «Хлiб», DVD, выдадзены Нацыянальным Цэнтрам Аляксандра Даўжэнка (UA) 2014 — «Thou», CD, лэйбл «Hevhetia» (SK) 

Кантакты: e-mail:  portmone@gmail.com mobile: +37544 7088688;  +37529 3193059 web: http://portmonetrio.com

Праслухаць некалькі п'ес з новага альбому трыа можна на афіцыйным сайце калектыва: http://portmonetrio.com/    


 

Хочаце ведаць больш? Сачыце за нашымі публікацыямі ў Telegram і Facebook!

Каментаваць