БНФ — хоць разарвіся

Агранізатары «Кангрэсу за незалежнасць Беларусі» падставілі Партыю БНФ. Не ўдзельнічаць у ім БНФ не можа па-вызначэнні, а ўдзельнічаць у ініцыятыве з непрадказальнымі вынікамі не надта хочацца.



Сойм Партыі БНФ, які прайшоў 30 жніўня ў Мінску, — апошні перад маючым адбыцца з'ездам партыі. На ім не толькі падбіваліся вынікі працы, але і планаваліся дзеянні ПБНФ на наступны, напружаны 2015 год — год прэзідэнцкіх выбараў. У гэтым сэнсе наконт партыі можна не хвалявацца: якім бы ні быў вынік з'езду, якое б кіраўніцтва на ім не абралася, партыя будзе працаваць у рэчышчы вызначанай стратэгіі.

Напачатку Сойму, як выразіўся лідэр ПБНФ Адляксей Янукевіч, «невядомыя зладзілі невялічкі флэш-моб». Некаторыя крэслы ў залі пасяджэння былі «забраніяваныя» таблічкамі з надпісам: «Месца для жанчыны». Спачатку жартавалі пра тое, што партыя нарэшце звяртае ўвагу на пытанні гендэрнай роўнасці. Некаторыя пабачылі ў гэтым лозунг «Жанчыну — ў прэзідэнты!», ці хаця б у кіраўнікі партыі. Хутчэй жа за ўсё, гэта быў намёк: на Сойме павінна было быць абмеркаванае пытанне пра наступны склад гэтага Сойму. А жанчын у гэтым кіраўнічым органе — на пальцах адной рукі можна пералічыць. Гэткае ненавязлівае нагадванне пра хібы ў кіраўніцтве.

Нягледзячы на гэта, спрэчкі ў асноўным адбываліся па пытаннях наступных прэзідэнцкіх выбараў.

Аляксей Янукевіч найперш даклаў, што перамовы пра Кангрэс дэмакратычных сілаў і выбранне на ім адзінага кандыдата ад апазіцыі ідуць, але, на ягоную думку, хутка скончацца. На апошнім пасяджэнні «сямёркі" палітычных суб'ектаў абмяркоўвалася прапанова Мікалая Статкевіча па вылучэнні кандыдатам у прэзідэнты палітвязня, — хоць бы і самога Статкевіча, і аб далейшым байкоце выбараў. «Пры ўсёй павазе да Мікалая Віктаравіча, гэтая прапанова была адхіленая, — паведаміў Янукевіч. — Вылучаць кандыдатам у прэзідэнты чалавека, які не мае магчымасці нават зарэгістраваць ініцыятыўную групу па зборы подпісаў — гэта значыць самаўхіліцца ад прэзідэнцкай кампаніі. Размова ідзе сапраўды пра самаўхіленне, нават не пра байкот».

Сапраўды, кандыдат у прэзідэнты павінен асабіста перадаць у ЦВК спіс сябраў ініцыятыўнай групы, пра што Мікола Віктаравіч не падумаў. Палітвязня ж з турмы на пасяджэнне ЦВК наўрад ці хто выпусціць.

Па словах Янукевіча, 9 верасня павінен адбыцца новы раўнд перамоваў у межах «сямёркі". Палітыкі «амаль дамовіліся» пра працэдуру вылучэння дэлегатаў на Кангрэс дэмакратычных сіл (КДС), і, магчыма, да з'езду партыі гэтая працэдура ўжо будзе вызначаная. А значыць, трэба будзе думаць над «персаналіяй» магчымага адзінага кандыдата ў прэзідэнты ад дэмакратычных сілаў.

Зразумела, БНФ падтрымае толькі адну кандыдатуру — кандыдатуру, якая будзе стаяць на пазіцыях захавання незалежнасці Беларусі і на нацыянальна-дэмакратычных каштоўнасцях. Партыя БНФ будзе вылучаць такога прэтэндэнта на «адзінага». Калі ён не з'явіцца сам, то на з'ездзе партыі ягоным удзельнікам будуць прапанаваныя некалькі кандыдатураў з тых, хто заявіў аб сваіх прэзідэнцкіх амбіцыях, і адпавядае крытэру «дэмакрата-незалежніка». А там ужо дэлегаты з'езду абяруць прэтэндэнта рэйтынгавым галасаваннем.

У тым, што на КДС абяруць менавіта такую кандыдатуру, амаль ніхто не сумняваўся, да тае пары, пакуль не ўзнікла пытанне: «А што будзем рабіць, калі КДС абярэ іншага?». Але і на гэтае пытанне знайшоўся адказ. Тады ПБНФ паспрабуе перацягнуць на свой бок нацыянальна-дэмакратычныя сілы, і будзе яшчэ адзін «адзіны кандыдат», але ўжо ад нацыянальна-дэмакратычных сілаў.

Усё гэта выглядала добра і спланавана да тых часоў, пакуль Янукевіч на паведаміў. Што атрымаў запрашэнне паўдзельнічаць у аргкамітэце па скліканні «Кангрэсу за незалежнасць Беларусі" (КНБ). Пры гэтым ён зазначыў, што такія ж запрашэнні атрымалі і шэраг іншых нацыянальна-дэмакратычных арганізацый. І некаторыя з іх — напрыклад, «Беларуская хрысціянская дэмакратыя», ад такога ўдзелу ўжо адмовіліся.

Сапраўды, што вядома пра КНБ? Вядома, што гэтая ініцыятыва ўзнікла ў «інтэлігенцкіх колах»: яго правядзенне падтрымалі Таварыства беларускай мовы і Рада інтэлігенцыі. Вядома, што запрашэнне Янукевічу ад імя ініцыятараў КНБ падпісала Алена Анісім, якая выказала намер балатавацца кандыдатам у прэзідэнты. Бадай, гэта ўсё. «Уцямна акрэсленай ідэі правядзення гэтага кангрэсу, дзеля чаго ён праводзіцца і па якіх пытаннях, павесткі дня, — я не ведаю» — зазначыў Янукевіч.

Аляксей Янукевіч заклапочаны не пераабраннем на пасаду старшыні партыі, а «выклікам КНБ»

Не ўдзельнічаць у «Кангрэсе за незалежнасць Беларусі" партыя папросту не можа. Старэйшая партыя, якая заўсёды выступала за незалежнасць Беларусі, якая, лічы, гэту незалежнасць стварыла і яе дамаглася, якая заўсёды выступала ў абарону незалежнасці і гэтак далей, адмовілася ад удзелу ў Кангрэсе за незалежнасць — як гэта будзе выглядаць? Выглядаць гэта будзе, скажам шчыра, вельмі кепска.

А калі КНБ будзе «праціскаць» Анісім кандыдатам у прэзідэнты? Альбо ПБНФ «падпісваецца» за Анісім, што будзе дрэнна выглядаць у межах дамоўленасцяў з «сямёркай», і з «братэрскімі арганізацыямі" кшталту БХД. Альбо ПБНФ заяўляе на КНБ, што не падтрымлівае Анісім, і ў «Кангрэсе за незалежнасць», які мае прадэманстраваць аб'яднанне нацыянальна-дэмакратычных сілаў, адбываецца раскол. І «раскольнікамі" з'яўляецца, як ні круці, Партыя БНФ. Гэта яшчэ горай, чым «пракінуць» дамоўленасці ў межах падрыхтоўкі КДС: «сямёрка» хаця б зразумее і прабачыць…

На думку намесніка старшыні ПБНФ Ігара Лялькова, нават простае абмеркаванне «кандыдата ў прэзідэнты ад КНБ» на гэтым мерапрыемстве падзеліць незалежніцкія сілы як мінімум на два лагеры: на тых, хто такую кандыдатуру (безадносна, Анісім гэта будзе, ці не) падтрымлівае, і на тых, хто яе не падтрымае. І замест дэманстрацыі адзінства ў абароне незалежнасці мы атрымаем раскол у незалежніцкіх сілах.

Да таго ж, з адмовай БХД становіцца зразумела, што не ўсе нацыянальна-дэмакратычныя сілы будуць удзельнічаць у Кангрэсе. А без іх «незалежніцкі блок» не поўны, што таксама ставіць пад сумнеў мэты і задачы КНБ.

Паўстае магутнае пытанне і ў тым, хто будзе ладзіць КНБ? Зразумела, ініцыятарамі выступіла Рада інтэлігенцыі. Але наконт практычных здольнасцяў правесці такое мерапрыемства сіламі адной Рады ў партыйцаў узніклі абгрунтаваныя сумневы. Адна справа — ліст у газету напісаць і «самавылучыцца» у прэзідэнты, іншая справа — распрацаваць парадак вылучэння дэлегатаў на Кангрэс, правесці рэгіянальныя сходы па вылучэнні, дамовіцца з месцам правядзення, аплаціць арэнду залі (што немалаважна), прывезці на кангрэс дэлегатаў, і гэтак далей, і далей… Ды проста раздрукаваць 300 — 500 асобнікаў праграмы і рэзалюцыяў! На ўсё гэта патрэбны час і даволі немалыя сродкі.

Ці не атрымаецца так, што БНФ зробіць усю «чарнавую» працу (зразумела, за кошт іншай патрэбнай і важнай працы), а «вяршкі" з гэтага здыме нехта іншы? Ды яшчэ і абвінаваціць пасля БНФ у «расколе» ды «правале»? І ці не атрымаецца так, што БНФ, замест таго, каб працаваць на прэзідэнцкую кампанію, загразне ў чыста тэхнічнай працы па правядзенні адразу двух мерапрыемстваў: КДС і КНБ? І ўвогуле, ці не разарвецца адзін БНФ на ўсе гэтыя кангрэсы?

А калі нават не разарвецца, ці не надарвецца партыя з такімі высілкамі, што і сілаў на прэзідэнцкую кампанію не застанецца: усе яны ў Кангрэсах скончацца?

У выніку БНФ вырашыў адкласці за з'езду ўсе пытанні. І пытанні КДС, у надзеі, што нешта з ім вырашыцца 9 верасня, і пытанне ўдзелу у КНБ. Вырашана спачатку дэлегаваць у ягоны аргкамітэт прадстаўніка ад БНФ «без права вырашаючага голасу» — каб паглядзець, што там ды як. А пытанне аб тым, як удзельнічаць у КНБ, ужо будзе вырашаць з'езд партыі, які пройдзе праз два тыдні — 13 верасня.

Абмеркаванне:

  • ВР
  • 2014-08-31 00:41:55
1. "АГРанізатары", "паТРыі" (двойчы), "геРндэрнай", "АДляксей Янукевіч", "Вбранне", ""пакуль Янукевіч
нА паведаміў. Што атрымаў", "па якіх пытанНнях", "на гэтым мерапрыЕСтве", "адкласці За з'езду" ... Забаўна!



2. "...пра што Мікола Віктаравіч не падумаў". Можа, не варта вырашаць за палітвязня, пра што ён падумаў, а пра што не?
  • кот
  • 2014-09-01 00:11:18
А чаму не вырашаць за яго? Відавочна не падумаў. І дазваляе сабе за іншыя партыі вырашаць.

Каментаваць