Карл Більт: Лукашэнка паліць апошнія масты

Сталі вядомыя жорсткія рэакцыі еўрапейскіх замежных міністраў на адказ афіцыйнага Мінска на санкцыі ЕС.



Сталі вядомыя жорсткія рэакцыі еўрапейскіх замежных міністраў на адказ афіцыйнага Мінска на санкцыі ЕС.

Еўрапейскія міністры жорстка адрэагавалі на рашэнне ўладаў Беларусі выслаць з краіны кіраўніцы Прадстаўніцтва Еўрасаюза і амбасадара Польшчы.
 
"Усё больш і больш Лукашэнка ўпадае ў адчай. І цяпер гэта бачна вельмі добра. Адкліканне амбасадараў ЕС і Польшчы — гэта крок, які сутыкнецца з адказам усяго Еўрасаюза. Дыктатар пачынае паліць за сабой апошнія масты, а гэта не значыць, што ён добра скончыць", — перадаюць словы старшыні замежнага ведамства Швецыі Карла Більта польскія СМІ.

На думку літоўскага міністра Ажубаліса, рашэнне Лукашэнкі адклікаць амбасадараў ЕС і Польшчы — вялікая памылка. "Вельмі шкада, што ён так паступіў. Гэта нямудры крок, бо акдліканне амбасадараў, якія з'яўляюцца самымі важнымі постацямі для правядзення дыялогу, — гэта яснае пацверджанне, што ён больш дыялог весці не хоча", — заявіў Аўдроніс Ажубаліс.

"У знак салідарнасці і еднасці, вырашана, што амбасадары ўсіх краін ЕС будуць адкліканы з Мінску на кансультацыі ў іх сталіцы. Усе краіны ЕС таксама выклічуць беларускіх амбасадараў у свае замежныя міністэрствы", — паведамляе ў спецыяльным звароце Кэтрын Эштан, абмеркаваўшы беларускае пытанне на надзвычайнай сустрэчы ў Брусэлі.

Сігнал да такой хуткай і жорсткай рэакцыі даў нямецкі замежны міністр Гіда Вэстэрвеле, які першы прыняў рашэнне адклікаць свайго амбасадара з Мінску. "Дыктатар памыляецца, думаючы, што можа нас падзяліць. Мы будзем рэагаваць разам, ЕС ды Польшча могуць разлічваць на поўную салідарнасць Нямеччыны", заявіў міністр.

Паводле euroradio.fm
 

Каментаваць