«Не зусім разумеюць і прызнаюць стратэгію мірных перамен»

Кампанія «Гавары праўду» вызначылася са спісам кандыдатаў у дэпутаты. Жадаючыя пазмагацца за мандат прайшлі жорсткі арганізацыйны і ідэалагічны адбор.

У яго выніку з больш чым 60 прэтэндэнтаў на дэпутацкае крэсла ў спісе «Гавары праўду» засталося 29 чалавек. З іх у Мінску будуць балатавацца толькі шасцёра, астатнія — у рэгіёнах.

Караткевіч і Дзмітрыеў не чакаюць лёгкай кампаніі

Караткевіч і Дзмітрыеў не чакаюць лёгкай кампаніі



Як паведаміў на прэзентацыі спісу кандыдатаў, якія ўжо 28 чэрвеня пачнуць падаваць дакументы для атрымання кандыдацкага статусу, кіраўнік выбарчага штаба «ГП» Сяргей Вазняк, прэтэндэнты прайшлі даволі жорсткі кастынг. Справа ў тым, што стратэгіяй арганізацыі можна назваць лозунг: «Перамагаць, нягледзячы ні на што». Тым, хто ідзе на выбары дзеля «прапаганды сваіх каштоўнасцяў», альбо «павышэння вядомасці сярод электарату» ў спісах «ГП» рабіць няма чаго. У кампаніі лічаць, што гэтыя рэчы, — прапаганда і пашырэнне вядомасці, — магчымыя толькі праз паўнавартасную барацьбу за мандат на выбарчым участку. То бок, «схалявіць», не атрымаецца. А таму большая частка адсеяных прэтэндэнтаў на кандыдацтва ад «ГП» проста цвяроза ацаніла сваю моц. І вырашыла, што для паўнавартаснай кампаніі ім не хапае сілаў.

Напачатку сходу прэтэндэнтаў у кандыдацтва Вазняк паказваў, як працуе парламент

Напачатку сходу прэтэндэнтаў у кандыдацтва Вазняк паказваў, як працуе парламент



Дарэчы, яшчэ тры месяцы таму лідарка «ГП» Таццяна Караткевіч казала «Новаму Часу», што ў кандыдатах застаюцца 40 прэтэндэнтаў. Гэтая лічба, як бачым, паменшылася.

Але была і некаторая частка кандыдатаў, якія не прайшлі ўнутраны адбор з-за таго, што яны «не зусім разумеюць і прызнаюць стратэгію мірных перамен». Так напісана ў прэс-рэлізе кампаніі. Як распавёў Вазняк, крытэрам адбору была не толькі моц камандаў патэнцыйных кандыдатаў у дэпутаты. Іх разглядалі яшчэ і праз прызму адданасці ідэі. То бок, глядзелі, што прэтэндэнты пішуць у сацсетках, як яны выказваюцца і пра што. Адзін чалавек, напрыклад, наўпрост запытаўся: ці трапляе ён у «тыя пяць чалавек, якія «ГП» па дамоўленасці з уладай правядзе ў парламент». Зразумела, ніякіх дамоўленасцяў з уладай у «праўдыстаў» няма, і ніякіх квотаў ім не прапаноўвалася. Таму з гэтым чалавекам рассталіся — без асаблівых шкадаванняў.

З 29 патэнцыйных кандыдатаў толькі пяцёра маюць досвед удзелу ў парламенцкіх выбарах. А дзве траціны з іх увогуле далучыліся да кампаніі пасля ўдзелу Караткевіч у прэзідэнцкай гонцы. На наступны ж дзень пасля прэзідэнцкіх выбараў Караткевіч заклікала далучацца да яе кампаніі і абвясціла пачатак кампаніі парламенцкай. Гэтым шмат хто скарыстаўся, а таму жорсткі адбор кандыдатаў для «ГП» неабходны.

Апроч усяго іншага, як зазначыла перад прысутнымі Таццяна Караткевіч, у прэтэндэнтаў на кандыдацтва ёсць яшчэ адна ўмова: нягледзячы на тое, якімі будуць вынікі выбараў, яны застаюцца працаваць у сваіх выбарчых акругах і надалей. А гэта ўжо — пераход ад адзінкавага ўдзелу ў кампаніі ў «сталыя палітыкі», — спадабаецца не кожнаму. Палітыка — рэч непрыбытковая, а вось страціць з-за яе можна шмат.


Караткевіч сказала, што на прэзідэнцкіх выбарах яна атрымала «крэдыт даверу» — за яе галасавалі каля мільёна людзей. І гэта дало ёй магчымасць стасавацца з уладаю калі не на роўных, дык хаця б маючы на гэта маральнае права. «Гавары праўду» — апазіцыйная арганізацыя, — наўпрост заявіла яна. — Аднак бы абіраем шлях дыялогу замест канфрантацыі». І тое, што ўлада «худа-бедна, але пайшла на рэформы, якія яна не называе рэформамі», азначае, што «ГП» пачулі, лічыць Караткевіч.

Самаму маладому вылучэнцу на кандыдацтва ад «ГП» 23 гады, самаму старому — 65. Сярод прэтэндэнтаў на парламенцкае месца — фермеры, прадпрымальнікі, юрысты, эканамісты і інжынеры. І нават былы старшыня Рагачоўскага райвыканкаму Мікалай Камароўскі. А вось з гендэрным складам у кампаніі правал: на дэпутацтва ідуць 24 мужчыны і толькі пяць жанчынаў. «Кепска мы працуем, — адзначыў Вазняк, звяртаючыся да Караткевіч. — Таццяна, вы здолелі зачараваць мужчынаў, а вось я, так, не спрацаваў, не зачароўваю жанчын».

Намеснік старшыні «ГП» Андрэй Дзмітрыеў, як высветлілася — адзін з тых, хто раней не прымаў удзелу ў парламенцкай кампаніі ў якасці кандыдата ў дэпутаты. Ён лічыць, што «канструктыўная апазіцыя» — самы слушны шлях да народа. «Мы перамагаем, калі перамагаюць нашыя ідэі» — зазначыў ён, і прывёў у якасці прыклада выступ на усебеларускім сходзе губернатара Мінскай вобласці Сямёна Шапіры. Які, сказаў Дзмітрыеў, быў напалову плагіятам перадвыбарчай кампаніі Караткевіч.



Сярод 29 вылучэнцаў у парламент ад «ГП» толькі трое маюць партыйнасць. Але нават гэтая тройка не збіраецца (пакуль што) вылучацца ў кандыдаты шляхам партыйнага спісу. Усе кандыдаты ў кандыдаты будуць збіраць подпісы грамадзянаў за сваё вылучэнне. І гэта будзе першай праверкай на трываласць і якасць кандыдатаў ад «ГП». Бо, гледзячы на надвор’е, выпадае казаць, што ўмовы для збору подпісаў будуць нічым не лепшыя за мінулую прэзідэнцкую кампанію.

А тады мы і паглядзім, хто з кандыдатаў вытрывае першы этап.


Каментаваць