Палітвязень Ігар Аліневіч — у ШЫЗА

Ігар Аліневіч правядзе ў штрафным ізалятары 10 дзён.



 "На мінулым тыдні збіраліся да Ігара на кароткатэрміновае спатканне, і тут нам паведамляюць, што ён у штрафным ізалятары,  — паведаміла маці Ігара, Валянціна Аліневіч.  — Як гром з яснага неба. Рэч у тым, што даслоўна ў канцы чэрвеня яго перавялі ў новую калонію, якая адрознівалася ад ранейшай, наваполацкай, сваёй экалогіяй, бачнасцю захавання законнасці, бытавымі ўмовамі і г.д. Увесь гэты час Ігар пазітыўна адгукаўся пра больш-менш чалавечыя ўмовы ў гэтай калоніі і, пра цуд, яму нават дазволілі набыць тэлефонную картку і патэлефанаваць першы раз за паўгода ў першай дэкадзе верасня. Напэўна, проста прыглядаліся.
 
 
Загад ёсць загад і яго трэба выконваць. Спачатку канфіскавалі мой ліст, матывуючы тым, што там забароненыя звесткі. Потым пасадзілі на 10 дзён у штрафны ізалятар.
 
 
Не ведаю, што за нелюдзі і дамарослыя псіхолагі працуюць у нашых спецслужбах, але гэта ўжо стала традыцыяй садзіць нашых палітычных менавіта на іх дні нараджэнні. Так было і з Колем Дзядком на ягоны дзень нараджэння ў жніўні (20 дзён штрафнога ізалятара), так і з астатнімі палітычнымі вязнямі. Лаўры Васьковіча, які прасядзеў за год у штрафным ізалятары 240 дзён, мабыць, не даюць спакою".
 
 
Маці палітвязня паведаміла, што на мінулым тыдні прыйшла паштоўка ад Ігара Аліневіча, датаваная 30 верасня.
 
 
«Добры дзень, мама і тата!  — цытуе яна. - Пасля таго канфіскаванага ліста атрымаў вашае віншаванне з днём нараджэння. Дзякуй! Вельмі душэўнае! Акрамя вашага, пакуль што не атрымліваў ніводнага віншавання. На жаль, але хмары над мной згусціліся. Ужо адседзеў 10 дзён у штрафным ізалятары і, хутчэй за ўсё, гэтым справа не скончыцца. Увогуле, усё паноў, вяртаемся на ўзровень 2012 года. Пры такім раскладзе я з'яўлюся ў атрадзе 11 кастрычніка, калі не дадуць дадатковых дзён арышту. Але абавязкова патэлефануйце ў калонію ў гэты дзень для ўпэўненасці, што я ў атрадзе, а не ў штрафным ізалятары. На гэтым я сканчаю. Цалую! Я збіраюся абскардзіць усё».
 
 
Палітвязень прабудзе ў штрафным ізалятары да 20 кастрычніка.
 
 
Актывіст анархісцкага руху Ігар Аліневіч быў асуджаны на 8 гадоў пазбаўлення волі паводле абвінавачвання ў хуліганскіх дзеяннях што да афіцыйных будынкаў. Сваёй віны ён не прызнаў і адмовіўся пісаць прашэнне аб памілаванні.
 
Паводле "Хартыі'97"

Каментаваць