Павал Севярынец: Рэпрэсіі ўзмацняюцца перад выбарамі

У Мінску вечарам 19 жніўня адбыўся круглы стол, прысвечаны тэме рэпрэсіяў супраць беларускай моладзі. Нагодай сталі затрыманне і арышт за патрыятычнае графіці "Беларусь мае быць беларускай!"



У круглым стале “Рэпрэсіі супраць беларускай моладзі” прынялі ўдзел прадстаўнікі ініцыятывы "За Волю", БХД, моладзевых структур "Маладыя хрысціянскія дэмакраты", "Маладая Беларусь", "Альтэрнатыва", "Маладыя дэмакраты", "Малады Фронт", а таксама "Еўрапейскай Беларусі", "Беларускага руху", Праваабарончай арганізацыі "Веча", Беларускага дакументацыйнага цэнтру.

Паводле слоў Паўла Севярынца, круглы стол закліканы скаардынаваць рэакцыю грамадзянскай супольнасці на ўзмацненне рэпрэсій і паспрыяць вызваленню палітвязняў.

Падчас круглага стала абмяркоўваліся тэма пераследу чатырох чалавек за патрыятычныя беларускамоўныя графіці "Беларусь мае быць беларускай!". (Двое чалавек — Максім Пекарскі і Вадзім Жаромскі — зараз знаходзяцца за кратамі, яшчэ двое — пад падпіскай аб нявыездзе), тэма сацыяльнай неабароненасці беларускіх добраахвотнікаў, якія бароняць украінскую зямлю ад расійскіх захопнікаў, узмацненне ціску на беларускіх футбольных фанатаў, а таксама праблема палітвязняў увогуле.

Удзельнікі круглага стала намераны рыхтаваць акцыі салідарнасці з палітвязнямі і ствараць міжнародны розгалас з нагоды ўзмацнення рэпрэсій. Так, прапанавана 20 жніўня пад эгідай пікета па зборы подпісаў за Анатоля Лябедзьку правесці акцыю салідарнасці з затрыманымі графітыстамі каля СІЗА на Валадарскага, 2. Меркаваны пачатак акцыі 18.00.

Бліжэйшым часам ў дыпламатычныя прадстаўніцтвы і замежным арганізацыям-партнёрам будзе накіраваны зварот з інфармацыяй пра рэпрэсіі ў Беларусі.

У сваім выступе Павал Севярынец адзначыў, што ўзмацненне рэпрэсій адбываецца напярэдадні выбараў, паколькі ўладам патрэбныя новыя палітвязні для далейшага "гандлю" імі з Еўропай, і да таго ж улады такім чынам застрашваюць грамадства.

Прысутныя далучыліся да заявы ПЦ "Вясна", у якой заклікаецца спыніць пераслед графітыстаў Максіма Пекарскага, Вадзіма Жаромскага, Вячаслава Касінерава, Яраслава Ульяненкава, а таксама ініцыявалі зварот да патэнцыйных кандыдатаў на выбарах прэзідэнта, каб яны абумовілі свой далейшы ўдзел у выбачай кампаніі спыненнем палітычных рэпрэсій і вызваленнем палітвязняў. Удзельнікі круглага стала таксама заклікалі ўсіх неабыякавых грамадзян дасылаць лісты падтрымкі на адрас: 220050 Мінск, Валадарскага, 2, СІЗА, куды нядаўна перавялі Максіма Пекарскага (у хлопца заўтра дзень народзінаў) і Вадзіма Жаромскага.

Абмеркаванне:

  • ВР
  • 2015-08-20 02:06:23
"Севярынец" (у загалоўку "я" прапушчана)

Каментаваць