Райвыканкам пра полацкі свабодны прафсаюз: «Мы выкарысталі ўсе законныя метады, але ліквідаваць не здолелі»

У Полацку ўсё яшчэ ідуць спробы ліквідаваць першасную арганізацыю Свабоднага прафсаюзу на ААТ «Полацак-Шкловалакно». Па дапамогу ў ліквідацыі суполкі намеснік старшыні Полацкага райвыканкаму Пётр Пяткевіч звярнуўся ў адміністрацыю прэзыдэнта і да полацкай дэпутаткі Палаты прадстаўнікоў, старшыні камісіі па заканадаўстве Наталлі Гуйвік.
Дэпутатка Наталля Гуйвік і актывіст СПБ Віктар Стукаў. Фота: «Віцебская вясна»

Дэпутатка Наталля Гуйвік і актывіст СПБ Віктар Стукаў. Фота: «Віцебская вясна»

Сутнасць зваротаў прадстаўніка райвыканкаму: «Дапамажыце нам ліквідаваць першасную арганізацыю Свабоднага прафсаюзу на ААТ „Полацак-Шкловалакно“. Мы выкарысталі ўсе законныя метады, але ліквідаваць не здолелі».

Да кіраўніцы адміністрацыі прэзыдэнта Наталлі Качанавай запыт не дайшоў, бо адказ не быў адобраны юрыстам райвыканкаму.

А вось адказ ад дэпутаткі Наталлі Гуйвік прыйшоў. Для яе просьба, выказаная ў звароце, выявілася незразумелай:

«Прашу канкрэтызаваць, якое менавіта садзейнічанне ў вырашэнні гэтага пытання Вам павінен аказаць дэпутат Палаты прадстаўнікоў Нацыянальнага сходу Рэспублікі Беларусь у межах сваёй кампетэнцыі», — сказана ў адказе Наталлі Гуйвік.

Падчас асабістай сустрэчы з актывістам прафсаюзу Віктарам Стукавым дэпутатка патлумачыла, што дадатковай інфармацыі ад Пятра Пяткевіча яна пакуль не атрымлівала.

Доступ да згаданага ліставання Віктар Стукаў атрымаў у выніку азнаямлення з матэрыяламі справы, якую ўжо амаль паўгода вядзе полацкая міліцыя ў дачыненні да яго на заяву Андрэя Кузьміна, намесніка па ідэалогіі полацкага «Шкловалакна». Андрэй Кузьмін пакуль беспаспяхова спрабуе распачаць у дачыненні да актывіста крымінальную справу за нібыта нанесеныя яму абразы на сайце spbpolack.ru.

Паводле spring96.org

Хочаце ведаць больш? Сачыце за нашымі публікацыямі ў Telegram і Facebook!

Абмеркаванне:

  • ВР
  • 2018-04-05 17:17:09
Ха-ха! Намеснік старшыні райвыканкама - першы кандыдат на пасаду намесніка сакратара сельсавета.

Каментаваць