Італія. На Сардзініі свая валюта

Італьянскі востраў Сардзінія зрабіў сур’ёзны крок у напрамку стварэння сваёй мясцовай грашовай сістэмы. Упершыню мясцовымі альтэрнатыўнымі еўра грашыма, якія называюцца «сардэкс», пачалі выдаваць заробкі.



Праўда, пабачыць купюры нельга. Гэта віртуальныя грошы, ідэю якіх прыдумалі некалькі беспрацоўных эканамістаў у 2009 годзе. Формула сардзінскай фінансавай сістэмы вельмі простая. Разлікі ў «сардэксах» пабудаваныя на кампенсацыйнай, клірынгавай сістэме, калі фірмы прадаюць тавары і паслугі іншым спажыўцам па безнаяўным разліку, зарабляючы крэдыты, якія трацяць на набыццё іншых, неабходных ім тавараў і паслуг у фірмаў, якія таксама з’яўляюцца ўдзельнікамі «сардэкс». Зараз гэта каля тысячы прадпрыемстваў.

«Сардэкс» можна аплачваць практычна ўсё: ад аптовага і рознічнага гандлю да рэстаранаў, транспарту і сувязі. Толькі за першыя чатыры месяцы гэтага года плацяжы ў «сардэкс» перавысілі эквівалент у 4 мільёны еўра. І вось новы этап — кампаніі пачалі выплачваць зарплату сваім супрацоўнікам у «сардэкс». На цяперашні дзень заробак у «сардэксах» па ўсёй Сардзініі атрымліваюць каля 200 чалавек.

Паводле італьянскай прэсы

Каментаваць