Паўночная Карэя зноў няўдала спрабавала запусціць ракету

31 мая КНДР здзейсніла чарговую няўдалую спробу запусціць балістычную ракету. Папярэднія тры выпрабаванні такіх ракет таксама былі няўдалымі.

© EPA/KCNA/HANDOUT SOUTH KOREA

 

"Паўночная Карэя паспрабавала здзейсніць запуск ракеты з раёна паблізу Вонсан. Але ён не прынёс поспеху", — цытуе заяву Паўднёвай Карэі агенцтва "Рэнхал".

 

Тып ракеты не ўдакладняецца, аднак паведамляецца аб магчымай падрыхтоўцы КНДР да запуску балістычнай ракеты тыпу "Мусудан" сярэдняга радыусу дзеяння. У красавіку Пхеньян тры разы спрабаваў правесці выпрабаванне такой ракеты, аднак усе спробы аказаліся няўдалымі.

 

Нагадаем, ракета пад умоўнай назвай "Мусудан" была ўпершыню паказана на ваенным парадзе ў Пхеньяне ў 2010 годзе. На думку заходніх экспертаў, яна магла быць распрацавана на аснове савецкай вадкаснай балістычнай ракеты Р-27 для падводных лодак, якія ўжо знятыя з узбраення, адзначае ТАСС. Гэтая сістэма, на думку спецыялістаў, патэнцыйна можа нанесці ўдар па ўсёй тэрыторыі Японіі, уключаючы амерыканскія ваенныя базы на востраве Акінава, а таксама па востраву Гуам, што належыць ЗША. Лічыцца, што на ўзбраенні Карэйскай народнай арміі знаходзяцца каля 30 ракет такога тыпу.

 

Японія лічыць спробу запуску ракеты ў КНДР сур'ёзнай правакацыяй, якая накіравана супраць сусветнай супольнасці. Пра гэта паведаміў у аўторак, 31 мая, на прэс-канферэнцыі міністр замежных спраў краіны Фуміа Кісіда, паведамляе ТАСС.

 

"Запускі ракет, якія працягваюцца ў КНДР, — гэта сур'ёзныя правакацыйныя дзеянні ў дачыненні да ўсёй сусветнай супольнасці, у тым ліку Японіі", — сказаў ён. Па словах міністра, такія дзеянні Пхеньяна з'яўляюцца "абсалютна непрымальнымі".

 

Сітуацыя на Карэйскім паўвостраве абвастрылася пасля таго, як КНДР 6 студзеня правяла ядзернае выпрабаванне. 7 лютага Паўночная Карэя запусціла ракету-носьбіт са штучным спадарожнікам Зямлі ў парушэнне рэзалюцыі Савета Бяспекі ААН, што забараняе КНДР усялякія выпрабаванні балістычных ракет, нагадвае ВВС. У адказ Рада Бяспекі аднагалосна прыняла рэзалюцыю аб узмацненні жорсткасці санкцый у дачыненні да КНДР.



Каментаваць