Саргсян заклікае дэманстрантаў да дыялогу. Апазіцыя кажа, што ўжо позна

Прапанова лідарам апазіцыі прагучала ад новага прэм’ера толькі на дзявяты дзень пратэстаў.
Пратэст супраць абрання Сержа Саргсяна прэм

Пратэст супраць абрання Сержа Саргсяна прэм'ер-міністрам краіны. 19 красавіка 2018 года. Ерэван, Арменія. Фота – Artyom Geodakyan/TASS



Серж Саргсян, які быў прызначаны на пасаду прэмʼер-міністр пасля 10 гадоў прэзідэнтуры, заклікае да дыялогу з апазіцыйнымі дэманстрантамі.

«Я глыбока занепакоены палітычнымі падзеямі ў краіне і заклікаю дэпутата Ніколу Пашыняна распачаць палітычны дыялог, з тым каб пазбегнуць незваротных стратаў», – заявіў Саргсян. – Гэта павінна быць зроблена неадкладна».

Нікол Пашынян, апазіцыйны дэпутат і лідар пратэстаў, адказаў, што гэта «занадта позна, каб гаварыць з урадам.»

«Я заклікаю Сержа Саргсяна прыняць нашае патрабаванне», – цытуе апазіцыянера Reuters.

Удзельнікі вулічных акцыяў лічаць, што Саргсян чапляецца за ўладу, і патрабуюць ягонае адстаўкі.

Спецслужбы заяўляюць, што ў Арменіі рыхтаваліся выбухі

На фоне пратэстаў Служба нацыянальнай бяспекі Арменіі паведаміла ў суботу пра затрыманне шасці чалавек, датычных да падрыхтоўкі выбухаў у грамадскіх месцах.

Выбухі павінныя былі «прывесці да ўсеагульнай атмасферы страху», «ціску на дзяржаўныя органы і выкананню імі канкрэтных патрабаванняў», падае «Інтэрфакс».

Падазраваныя, па паведамленні спецслужбы, звязаныя з групоўкай «Сасна црэр», чальцы якой у 2016 годзе захапілі паліцэйскі полк у Ерэване.

Агулам у суботу было затрымана 93 дэманстранты.

Серж Саргсян быў прэзідэнтам Арменіі з 2008 года. Сёлета скончыўся ягоны другі, апошні, тэрмін. У аўторак парламент абраў Саргсяна прэмʼерам.

Згодна са зменамі ў Канстытуцыі, якія былі прынятыя пасля рэферэндуму ў 2015 годзе, цяпер прэмʼер-міністр мае вялікую ўладу ў Арменіі, пасада прэзідэнта стала ў значнай ступені цырыманіяльнай.

Пратэсты ў Арменіі цягнуцца з канца мінулага тыдня.

Паводле Белсат


Хочаце ведаць больш? Сачыце за нашымі публікацыямі ў Telegram і Facebook!

Каментаваць