Украіна прыпыняе транспартныя зносіны з Крымам

Транспартныя зносіны з часова акупаваным Крымам прыпыненыя, каб прадухіліць пранікненне на мацерыковую Украіну дыверсійных груп пад выглядам мірных жыхароў.



Як перадае карэспандэнт УНІАН, пра гэта сёння на брыфінгу ў Кіеве паведаміў прэс-сакратар АТА Андрэй Лысенка, адказваючы на пытанні журналістаў.

«Усе рухі, якія звязаны з перамяшчэннем па тэрыторыі Украіны на тэрыторыю, кантраляваную тэрарыстамі і ў адваротным кірунку, - гэта робіцца з-за таго, што вельмі высокая верагоднасць траплення пад выглядам мірных жыхароў дыверсійных груп... Зараз вельмі высокая небяспека — зараз практычна кожны дзень дзесці дыверсіі адбываюцца», — адзначыў Лысенка.

«Таму было прынята рашэнне па ўзмацненні кантролю і забеспячэнні бяспекі грамадзян ад дыверсійных груп. Бо пытанне бяспекі нашых грамадзян — гэта пытанне №1. Гэтае мерапрыемства з’яўляецца часовым. Таму просім з разуменнем да гэтага паставіцца», — сказаў Лысенка.

Як паведамляў УНІАН, «Укрзалізніца» у сувязі з мерамі бяспекі з 27 снежня абмяжоўвае маршрут руху цягнікоў, якія ідуць у Крым, да станцый Новааляксееўка і Херсон.

Акрамя таго, па рашэнні Міністэрства інфраструктуры, па меркаваннях бяспекі з 26 снежня часова прыпыненыя аўтамабільныя перавозкі ў Крым, у тым ліку і легкавых аўтамабілей.

Таксама ўкраінскія пагранічнікі перакрылі выезд з Марыупаля з мэтай папярэджання правакацый з боку прарасейскіх баевікоў. Прыпынена перамяшчэнне машын і пешаходаў у кірунку Кастрычніка, Паўлопаля. Таксама вядома, што 25 снежня ў 11.45 закрыты пропуск людзей у бок Марыупаля з тэрыторыі, падкантрольнай «ДНР».

Нагадаем, што з 27 снежня Беларуская чыгунка таксама адмяніла цягнік «Мінск — Сімферопаль». 

Каментаваць