Абавязковы продаж валюты знізіўся ў верасні на 34,5%

У верасні аб'ём абавязковага продажу замежнай валюты скараціўся на 34,5%. Паводле інфармацыі БелаПАН, за верасень у лік абавязковага продажу суб'екты гаспадарання прадалі замежнай валюты на 364,4 млн долараў супраць 556,2 млн у жніўні.
 

З пачатку года ў лік абавязковага продажу прадпрыемствы прадалі больш за 4,4 млрд долараў.

Нацыянальны банк у жніўні 2016 года прыняў рашэнне аб зніжэнні 1 верасня нарматыву абавязковага продажу замежнай валюты з 30 да 20%.

"Гэтая мера дасць магчымасць актывізаваць інвестыцыйную і дзелавую актыўнасць суб'ектаў гаспадарання, стане дадатковым крокам у напрамку гарманізацыі валютнага заканадаўства ў межах Еўразійскага эканамічнага саюза і будзе спрыяць стварэнню роўных умоў для эканамічных суб'ектаў дзяржаў ЕАЭС па развіцці іх экспартнага патэнцыялу", — растлумачыў Нацбанк.

Паводле інфармацыі БелаПАН, праект стратэгіі развіцця фінансавага рынку, якую рыхтуе Нацыянальны банк, прадугледжвае паэтапнае зніжэнне ў 2016—2020 гадах нарматыву абавязковага продажу валютнай выручкі.

На думку ўдзельнікаў фінансавага рынку, абавязковы продаж валюты з'яўляецца страховачным механізмам для дзяржавы, які дазваляе гарантаваць устойлівую прапанову замежнай валюты ў выпадку росту дэвальвацыйных чаканняў.

Раней Беларусь у межах Еўразійскага эканамічнага саюза ўзяла на сябе абавязацельствы адмяніць абавязковы продаж валютнай выручкі.

Як лічаць суразмоўцы БелаПАН у банкаўскіх колах, на валютным рынку і ў плацежным балансе павінна складвацца спрыяльная сітуацыя, каб дзяржава магла цалкам адмовіцца ад абавязковага продажу валютнай выручкі. Паводле неафіцыйнай інфармацыі, Нацбанк можа цалкам адмяніць абавязковы продаж замежнай валюты ўжо ў 2017 годзе.

Дзмітрый Заяц, БелаПАН

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: