«АйПауэр» верне Брэсцкаму аблвыканкаму грошы, выдзеленыя на будаўніцтва акумулятарнага завода

5 лютага ў Брэсце эканамічны суд вынес рашэнне па пазове Брэсцкага аблвыканкама да ТАА «АйПауэр» аб вяртанні 5,7 млн рублёў, якія былі выдзеленыя кампаніі з інавацыйнага фонду выканкама на будаўніцтва акумулятарнага завода.
Завод АКБ. Фота belsat.eu

Завод АКБ. Фота belsat.eu

Суд падтрымаў іскавое патрабаванне аблвыканкама і абавязаў кампанію вярнуць выдзеленыя сродкі. Сустрэчны пазоў ТАА «АйПауэр» да аблвыканкаму адхілілі.

Рашэнне не ўступіла ў законную сілу і можа быць абскарджана.

5,7 мільёна рублёў, якія сталі прычынай спрэчкі, былі выдзелены з інавацыйнага фонду на будаўніцтва акумулятарнага завода. Брэсцкі аблвыканкам у сваім пазове настойваў, што кампанія не выканала ўмовы дагавора аб выдзяленні сродкаў, заключанага 25 кастрычніка 2016 года. Згодна з ім, да 31 ліпеня 2019 года акумулятарны завод павінны былі ўвесці ў эксплуатацыю, але гэтага не адбылося, пісала «Брестская газета».

«АйПауэр» пазоў не прызнаў. На іх думку, асноўным дакументам, на падставе якога ТАА рэалізуе праект па будаўніцтве завода, з'яўляецца інвестыцыйны дагавор, які заключаны кампаніяй з Рэспублікай Беларусь у асобе Брэсцкага аблвыканкама ў 2017 годзе. У інвестдагавора з улікам дадатковага пагаднення ўказаны наступныя тэрміны: увод у эксплуатацыю — другі квартал 2020 года. У сувязі з гэтым, як лічаць адвакаты «АйПауэра», абавязацельствы па будаўніцтве і ўводзе завода ў эксплуатацыю не парушаныя, у кампаніі ёсць яшчэ час.

На гэта прадстаўнікі істца адзначылі, што па інвестыцыйнай дамове, на якую спасылаюцца адвакаты «АйПауэр», грошы не выдзяляліся.

Акумулятарны завод будуе на прамысловай пляцоўцы «Аэрапорт» у свабоднай эканамічнай зоне «Брэст» ТАА «АйПауэр». Жыхары Брэста і некалькіх вёсак Брэсцкага раёна лічаць, што прадпрыемства пагражае іх здароўю. З 25 лютага 2018 года кожную нядзелю на плошчу Леніна ў Брэсце прыходзяць праціўнікі будаўніцтва акумулятарнага завода, якія абменьваюцца апошнімі навінамі аб будаўніцтве прадпрыемства.

14 чэрвеня Брэсцкі аблвыканкам апублікаваў на сваім сайце распараджэнне губернатара Ліса аб прыпыненні будаўніцтва акумулятарнага завода «да ліквідацыі выяўленых парушэнняў». 17 чэрвеня абласны камітэт прыродных рэсурсаў і аховы навакольнага асяроддзя прыпыніў дазвол заводу на выкід забруджвальных рэчываў у атмасферу.

2 ліпеня стала вядома, што Генпракуратура па даручэнні кіраўніка дзяржавы праводзіць праверку па сітуацыі з будаўніцтвам і ўвядзеннем у эксплуатацыю акумулятарнага завода ў Брэсце. У вытворчасць прынятыя крымінальныя справы, распачатыя Камітэтам дзяржаўнай бяспекі па арт. 430 (Атрыманне хабару) і 431 (Дача хабару) Крымінальнага кодэкса Беларусі ў дачыненні да кіраўніка ТАА «ПАК-кіраванне» Віктара Лемяшэўскага, галоўнага бухгалтара ТАА «Белінвестгандаль-Сплаў» Святланы Лемяшэўскай, былога дырэктара ТАА «Белінвестгандаль-Сплаў» Сяргея Ахрамчука, намесніка дырэктара ТАА «Белінвестгандаль-Сплаў» Івана Пакіслюка. 1 ліпеня іх заключылі пад варту, цяпер Лемяшэўскага, па некаторых дадзеных, выпусцілі. Акрамя таго, у ходзе следства будзе дадзена прававая ацэнка дзеянням і іншых службовых асоб, у тым ліку прадстаўнікоў дзяржаўных органаў.

21 лістапада старшыня Брэсцкага гарвыканкама Аляксандр Рагачук наведаў акумулятарны завод, каб праверыць, ці працуе прадпрыемства або прастойвае. Прадпрыемства не працуе, станкі стаяць. Цяпер на заводзе афіцыйна засталіся каля 25 чалавек: прадстаўнікі адміністрацыі «АйПауэра», кадравікі і тэхперсанал, які сочыць за ўчасткамі, што прастойваюць.

30 снежня 2019 года «АйПауэр» абвясціў аб правядзенні грамадскай экалагічнай экспертызы акумулятарнага завода. Праціўнікі завода назвалі яе блефам і адмовіліся прымаць дакументы «АйПауэра», спаслаўшыся на шэраг парушэнняў.

Паводле tut.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: