Беларуская «дачка» «Ашчадбанка» мае праблемы з ліквіднасцю ў Беларусі

Даччыны банк расійскага «Ашчадбанка» — «БПС-Ашчадбанк» — мае праблемы з ліквіднасцю ў Беларусі, паведаміў старшыня праўлення «Ашчадбанка» Герман Грэф.


«У нас ёсць праблемы (у Беларусі) з ліквіднасцю ў нацыянальнай валюце (у беларускім рублі), як ва ўсяго рынку, таму што фактычна Нацыянальны банк сёння спыніў прадастаўляць ліквіднасць і крэдытаванне ў нацыянальнай валюце спынена», — растлумачыў топ-менеджар 22 верасня ў інтэрв’ю тэлеканалу «Расія-24».

Паводле яго слоў, з ліквіднасцю ў расійскіх рублях і іншых валютах у «БПС-Ашчадбанка» праблем няма. «Аднак з беларускімі рублямі ёсць праблемы ва ўсіх удзельнікаў рынку, і пакуль Нацыянальны банк Беларусі не стабілізуе сітуацыю, не пачне прадастаўляць неабходны аб’ём ліквіднасці, я думаю, што ўсе ўдзельнікі рынку будуць адчуваць праблемы з ліквіднасцю», — заявіў Грэф.

Як паведамлялася, Нацыянальны банк Беларусі прыпыніў прадастаўленне банкам рублёвых рэсурсаў у рамках пастаянна даступных аперацый падтрымкі ліквіднасці ў трэцяй дэкадзе жніўня.

«У апошні час на фоне росту дэфіцыту ліквіднасці ў банкаўскай сістэме назіраецца досыць істотны рост крэдытнага партфеля банкаў у беларускіх рублях, што аказвае дадатковы ціск на ўнутраны валютны рынак», — тлумачыў рэгулятар сваё рашэнне.

У сувязі з гэтым было прынята рашэнне аб часовым прыпыненні пастаянна даступных аперацый падтрымкі ліквіднасці з 24 жніўня па 15 верасня, якое 14 верасня пралангавана да 13 кастрычніка. Рашэнне аб працягу тэрміну накіравана на замацаванне тэндэнцый па стабілізацыі сітуацыі на фінансавым рынку, растлумачыў Нацбанк.

У банкаўскай сістэме дэфіцыт рублёвай ліквіднасці паўстаў пасля прэзідэнцкіх выбараў, якія прайшлі 9 жніўня. Па словах прадстаўнікоў банкаўскага сектара, пасля выбараў у краіне на фоне палітычнага крызісу ўзмацніліся дэвальвацыйныя чаканні і назіраецца павышаны попыт на рублёвыя крэдыты з боку насельніцтва.

«Гэта класічная гісторыя. Калі ў насельніцтва ўзнікаюць дэвальвацыйныя чаканні, фізасобы забіраюць рублёвыя дэпазіты і бяруць рублёвыя крэдыты. І тое, і іншае — для таго, каб перайсці ў цвёрдую валюту альбо купіць тавары працяглага карыстання, якія з-за росту валютных курсаў могуць падаражэць», — растлумачыў БелаПАН топ-менеджар аднаго з банкаў.

У сувязі з дэфіцытам рублёвай ліквіднасці, які абумоўлены адтокам дэпазітаў і рашэннямі Нацбанка па абмежаванні прадастаўлення рублёвай ліквіднасці, многія банкі прыпынілі крэдытаванне насельніцтва.

На думку беларускіх эканамістаў, меры Нацбанка па абмежаванні прадастаўлення рублёвай ліквіднасці накіраваны на тое, каб знізіць рублёвую прапанову і тым самым аслабіць ціск на валютны рынак. У жніўні на фоне палітычнага крызісу ў Беларусі назіраўся павышаны попыт на валюту, які прывёў да росту курсу замежных валют на 8%.

Паводле naviny.media



Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: