Берлін дапускае ўвядзенне санкцый супраць беларускіх кампаній

Урад ФРГ уважліва сочыць за парушэннямі ў Беларусі правоў чалавека і грамадзянскіх правоў і адзначае, што ў гэтыя дзеянні ўцягнутыя некаторыя беларускія кампаніі.
Урад Германіі не выключае больш жорсткіх санкцый у дачыненні да адказных за парушэнні правоў чалавека ў Беларусі. У Берліне ўважліва сочаць за паведамленнямі пра меркаваны ўдзел некаторых беларускіх кампаній у парушэнні грамадзянскіх правоў і правоў чалавека ў дачыненні да ўдзельнікаў мірных пратэстаў у гэтай краіне, заявіў на ўрадавай прэс-канферэнцыі ў панядзелак, 16 лістапада, афіцыйны прадстаўнік МЗС Германіі Крыстаф Бургер (Christoph Burger) .

У сваю чаргу афіцыйны прадстаўнік урада ФРГ Штэфен Зайберт (Steffen Seibert), адкрываючы прэс-канферэнцыю, нагадаў пра мірныя пратэсты, якія працягваюцца роўна 100 дзён у Беларусі, і гвалт у дачыненні да дэманстрантаў. Урад ФРГ не забудзе, як у гэтай краіне "амаль штодня жорстка абыходзяцца з людзьмі на вуліцах", як амаль штодня затрымліваюць удзельнікаў мірных пратэстаў і падвяргаюць іх грубаму гвалту за сценамі турмаў, заявіў ён.

Ціханоўская паведаміла аб дыялогу з ЕС па пашырэнні чорнага спісу

У той жа дзень лідар беларускага пратэснага руху Святлана Ціханоўская на сустрэчы з амбасадарамі Даніі, Нідэрландаў, Швецыі, Канады, Ірландыі і прадстаўніком Паўночнага савета заклікала да "эканамічных санкцый супраць дзяржпрадпрыемстваў і фірмаў, звязаных з Лукашэнкам". У прыватнасці, яна паказала на магчымасць "прыпынення праграм фінансавага развіцця, якія ідуць праз дзяржаву", а таксама прыпынення супрацоўніцтва з дзяржбанкамі, у прыватнасці, Беларусбанкам і Белаграпрамбанкам, паведамляецца ў Telegram-канале Ціханоўскай.

На сустрэчы абмяркоўвалася абмежаванне на закупку нафтапрадуктаў з Беларусі і іншай прадукцыі дзяржпрадпрыемстваў. Ціханоўская таксама заявіла аб магчымым пашырэнні санкцыйных спісу ЕС у дачыненні да Мінска. "Дамаўляемся з іншымі краінамі, каб яны пашыралі, паглыблялі санкцыйныя спісы", — паведаміла яна і дадала, што чакае павелічэння чорнага спісу ЕС да 200 ці нават больш чалавек.

Акрамя таго, каманда галоўнага апанента беларускіх уладаў дамагаецца перагляду міжнародных праграм падтрымкі Беларусі з мэтай гарантаваць, "каб грошы не ішлі рэжыму, а напрамую беларускаму грамадству". У прыватнасці, абмяркоўваецца "магчымасць адключэння рэжыму Лукашэнкі ад сістэмы Swift", паведаміла прэс-служба Ціханоўскай. Паводле гэтых даных, ужо на гэтым тыдні краіны ЕС пашыраць індывідуальныя санкцыі ў дачыненні да Мінска і абмяркуюць магчымыя эканамічныя санкцыі.

Паводле dw.com

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: