«Цэментная мадэрнізацыя». Рабочыя ААТ «Краснасельскбудматэрыялы» скардзяцца на маленькую зарплату

Сур’ёзная эканамічная праблема саспела на адным з найбуйнейшых прадпрыемстваў Гродзенскай вобласці. Рабочыя ААТ «Краснасельскбудматэрыялы» выказалі незадаволенасць сваёй заработнай платай.


Адзін з рабочых распавёў, што работнікаў прадпрыемства прымушаюць пісаць заяву за свой кошт на тры дні, бо няма грошай на заробак, піша Газета Слонімская.

«Заробак упаў амаль удвая, збыт прадукцыі слабы, тэхніка — зношаная. У гэтым месяцы выдалі аванс рабочым усяго па 50-70 рублёў. Пасля таго, як людзі сталі скардзіцца і падымаць пытанне аб закрыцці завода і забастоўках, кіраўніцтва выплаціла яшчэ па 50 рублёў», — распавёў адзін з рабочых прадпрыемства.

Прайшла інфармацыя аб тым, што рабочых у горадзе, на кальцы каля ўнівермага, чакаў аўтазак, — на ўсялякі выпадак.

Тэлеграм-канал «Эканоміка па-беларуску» заўважае, што ў 2015-2018 гадах Мінфін заплаціў больш за паўмільярда (549 883 769,74) долараў за цэментныя заводы па кітайскіх крэдытах на мадэрнізацыю.

У 2019 годзе дзяржаўныя цэментныя заводы падтрымалі на 1 млрд. долараў. У 2020 годзе чыноўнікі дамовіліся пра прыярытэтную куплю беларускага цэменту. На 2021 год цэментныя заводы атрымалі льготную цану на газ.

Як бачым, гэта ўсё ўвогуле не дапамагае.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: