Цягнікі для мінскага метро зробяць у Беларусі

Новыя цягнікі для мінскага метро будзе рабіць Stadler. «Мы вельмі рады, што прынялі мудрае рашэнне прыйсці ў Беларусь», — адзначыў кіраўнік кампаніі.

Кампанія "Stadler" выйграла конкурс на пастаўку цягнікоў для метрапалітэна. Пра гэта сёння журналістам паведаміў генеральны дырэктар Stadler Rail Group Петэр Шпулер.

"Мы выйгралі конкурс на пастаўку цягнікоў для Мінскага метрапалітэна. Нашы інжынеры зараз працуюць над канструкцыяй новага рухомага саставу. Цягнікі для метро будуць цалкам збірацца на заводзе ў Мінску", — распавёў Петэр Шпулер.

На яго думку, гэты заказ стане вяхой у развіцці "Штадлер Мінск". "Нам патрэбныя прыклады такіх паспяховых праектаў, каб працаваць на рынках іншых краін СНД. Дзякуючы гэтай замове для нас адкрываецца ўвесь рынак постсавецкай прасторы. А гэта азначае стварэнне новых працоўных месцаў, працу для нашых супрацоўнікаў і ўклад у валавы нацыянальны прадукт", — падкрэсліў гендырэктар кампаніі.

Ён таксама распавёў , што цяпер на мінскім прадпрыемстве вырабляюцца двухпавярховыя цягнікі для Масквы і Санкт-Пецярбурга. Акрамя таго, кампанія выйграла тэндэр на пастаўку трамваяў у Астраву (Чэхія). Пры гэтым уладальнік Stadler Rail Group адзначыў, што гэта першы заказ такога роду.

Яшчэ адзін буйны праект выканаюць для Венгрыі — 40 двухпавярховых цягнікоў, кожны даўжынёй 150 метраў. "Прыкладна на 70–80% дабаўленага кошту будуць створаны на магутнасцях нашай кампаніі ў Мінску. Выкананне гэтай замовы пачнецца ў пачатку 2018 года", — дадаў гендырэктар.

Петэр Шпулер распавёў, што апошнія гады былі не самымі простымі. На падзенне заказаў для "Штадлер Мінск" паўплывала зніжэнне тарыфаў на чыгуначныя перавозкі, а таксама курсу расійскага рубля. Аднак кампаніі здолела ўтрымацца на добрым узроўні і стаць лепшым экспарцёрам па выніках 2016 года.

"Але цяпер становішча з заказамі паляпшаецца, і мы плануем ствараць новыя працоўныя месцы. І мы вельмі рады, што прынялі мудрае рашэнне прыйсці ў Беларусь. Прайшло ўжо пяць гадоў з таго часу, як была адкрыта наша вытворчасць у Мінску, і мы не шкадуем аб укладзеных інвестыцыях", — рэзюмаваў кіраўнік Stadler Rail Group.

 Паводле БЕЛТА, zviazda.by

 

 

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: