Хоць лакдаўна і не было, Беларусь усё роўна зведала эканамічныя шокі з-за COVID-19

Нягледзячы на адсутнасць афіцыйных абмежаванняў падчас пандэміі ў 2020 годзе, беларуская эканоміка зведала два тыпы шокаў, піша «Ежедневник».

Адзначым, што перыяд пачатку пандэміі ў Беларусі характарызаваўся мінімальным умяшаннем урада. У нас не было лакдаўна, не зачыняліся школы і ўніверсітэты. У Беларусі не было значнай падтрымкі прыватнага сектара, пры гэтым прымаўся шэраг адміністрацыйных мер для падтрымкі дзяржпрадпрыемстваў.

Гэта, безумоўна, адыграла сваю ролю ў барацьбе з эканамічнымі наступствамі пандэміі.

«Беларусь у 2020 годзе ўяўляе сабой унікальны кейс: як пандэмія ўплывае на эканоміку пры неўмяшанні дзяржавы», — заявіў эканаміст, эксперт «BEROC» Леў Львоўскі на анлайн-лекцыі «Адсутнасць лакдаўна ў Беларусі. Ці дапамагла яна пазбегнуць эканамічных шокаў?».

Эканамістамі «BEROC» было праведзена даследаванне на тэму «Як розныя сектары эканомікі і розныя групы людзей рэагавалі на шокі, звязаныя з COVID-19».

Леў Львоўскі адзначыў, што рэцэсія 2020 года ў свеце не была натуральнай. У большасці краін зніжэнне выпуску адбывалася штучна праз тое, што ўлады, якія клапаціліся пра здароўе насельніцтва, закрывалі краіны на лакдаўн альбо цалкам, альбо часткова.

Шок мабільнасці і знешняга попыту

Як заўважыў аналітык, тое, што ў Беларусі не было лакдаўна, зусім не азначае, што ў нас не было шокаў, звязаных з пандэміяй каронавіруса.

Паводле слоў Льва Львоўскага, Беларусь зведала два тыпы шокаў.

Першы — гэта шок мабільнасці насельніцтва. Нягледзячы на адсутнасць афіцыйных абмежаванняў, беларусы лічылі за лепшае не наведваць грамадскія месцы без патрэбы, з-за чаго паменшыўся попыт на кантактныя сервісы. Ад гэтага пацярпелі рытэйл, рэстараны і гасцініцы.

«Таксама беларуская эканоміка адчула шок знешняга попыту. Хоць у Беларусі і не было лакдаўнаў, але яны былі ў краінах — гандлёвых партнёрах нашай краіны», — звярнуў увагу эксперт.

Зменшыліся даходы

Львоўскі таксама распавёў, што ў ходзе даследавання аналітыкі пыталіся ў людзей, ці зменшыўся іх даход і калі зменшыўся, якія таму прычыны.

Як паказала даследаванне, найбольш частыя прычыны страты даходаў — гэта зніжэнне заробкаў, меншая колькасць рабочых дзён і неаплатны адпачынак, а таксама адмена бонусаў.

«Апытанне паказала, што людзі вельмі часта адзначалі змяншэнне сваіх даходаў. У самым пачатку пандэміі больш за ўсё ад гэтага пакутавалі людзі, якія працуюць у індустрыі гасціннасці і рытэйла. Услед за імі ідзе транспартная галіна», — распавёў эксперт «BEROC».

«Што тычыцца галіны прамысловай вытворчасці, калі ў пачатку пандэміі там адзначалася зніжэнне даходаў, то да верасня-лістапада галіна стала адной з самых стабільных ў гэтым плане. Работнікі гэтай галіны менш за ўсё гаварылі пра тое, што іх даходы знізіліся», — дадаў ён.

Сельская гаспадарка і фінансы таксама даволі стабільна прайшлі гэты перыяд.


Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: