«Гродна Азот» размясціў заяўкі на грузавыя перавозкі на 5 млн долараў. Ёсць цікавая ўмова

«Гродна Азот» размясціў дзве заяўкі (першая і другая) на закупку міжнародных транспартна-экспедыцыйных паслуг. Арыенціровачная сума па двух заяўках — амаль 5 мільёнаў 76 тысяч долараў.
Пры гэтым для патэнцыйных выканаўцаў ёсць шэраг умоў, сярод якіх — павінна быць магчымасць не называць «Гродна Азот» ў якасці боку канасамента (калі зусім спрасціць, то гэта адзін з дакументаў, які пацвярджае легальнасць перавозіцца грузу і права ўласнасці на яго).

Першая заяўка — на закупку транспартна-экспедыцыйных паслуг у міжнародным змяшаным і чыгуначным спалучэннях з 1 па 31 траўня гэтага года. Арыенціровачны кошт закупкі — 4 980 967 долараў. Канчатковая сума можа адрознівацца як у бок павелічэння, так і зніжэння. Крыніца фінансавання — уласныя сродкі прадпрыемства.

У гэтай заяўцы значацца больш за 80 лотаў на аўтамабільныя, марскія, чыгуначныя перавозкі. Сярод іх — экспартныя пастаўкі ў Кітай, Егіпет, Бразілію, Ізраіль, Інданэзію, Тайвань, Індыю, Туніс (праз порт у Клайпедзе), Турцыю, Мексіку, ПАР, Іарданію, Алжыр, Тайланд, Перу, Шры-Ланку, Калумбію, Чылі.

Імпартныя пастаўкі плануюцца з Кітая, Японіі (у тым ліку праз порт у Клайпедзе).

Чыгункай маюць намер экспартаваць груз у тым ліку ў Казахстан і Узбекістан, калі меркаваць па заяўцы на закупку.

Сярод умоў для патэнцыйных выканаўцаў — магчымасць не называць «Гродна Азот» ў якасці боку канасамента.

Другая заяўка — на закупку транспартна-экспедыцыйных паслуг у міжнародным змяшаным спалучэнні на красавік гэтага года (паўторны конкурс). Арыенціровачны кошт заяўкі - 95 тысяч долараў. Сярод патрабаванняў — таксама магчымасць не называць «Гродна Азот» ў якасці боку канасамента.

Крыніца фінансавання — уласныя сродкі прадпрыемства.

Удакладнім, што ў заяўках таксама фігуруе філіял «Завод Хімвалакно».

Раней у 2013, 2015 і 2016 гадах «Гродна Азот» (філіял «Завод Хімвалакно») у заяўках на закупкі паказваў таксама патрабаванне пра магчымасць не называць завод у якасці боку канасамента.

Нагадаем, Злучаныя Штаты Амерыкі могуць аднавіць санкцыі супраць беларускіх прадпрыемстваў, якія былі прыпыненыя ў 2015 годзе, і з таго часу гэта рашэнне неаднаразова падаўжалася. Сярод гэтых прадпрыемстваў значыўся у тым ліку «Гродна Азот».

Вашынгтон увёў санкцыі ў дачыненні да шэрагу нафтахімічных кампаній Беларусі пасля прэзідэнцкіх выбараў 2006 года, спасылаючыся на парушэнні правоў чалавека. У кастрычніку 2015 года санкцыі былі прыпыненыя, чаму спрыяла вызваленне палітвязняў. У далейшым гэта рашэнне неаднаразова прадаўжалася. 22 кастрычніка 2019 года прыпыненне санкцый працягнулі да 26 красавіка 2021 года.

Рашэнне распаўсюджваецца на кампаніі «Беларускі нафтавы гандлёвы дом», «Белнафтахім» і яе амерыканскі філіял, «Белшына», «Гродна Азот», «Гродна Хімвалакно», «Лакафарба», «Нафтан» і «Полацк Шкловалакно».

tut.by

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: