Як ПВТ стаў драйверам эканомікі Беларусі, калі астатнія ўпалі

Красавіцкая статыстыка па ВУП Беларусі паказала, што нават адсутнасць каранціну не гарантуе захавання дзелавой актыўнасці.
Упалі ўсе ўзбуйненыя віды дзейнасці акрамя чатырох: будаўніцтва, сельскай гаспадаркі, водазабеспячэння і сектара «інфармацыя і сувязь».

«Будоўля» расце па інэрцыі за кошт некалькіх буйных праектаў, сельская гаспадарка больш залежыць ад надвор'я, чым ад локдаўна, а водазабеспячэнне і збор / апрацоўка адходаў крышачку падраслі на фоне засушлівай вясны і, магчыма, павелічэння «вытворчасці» смецця ў перыяд самаізаляцыі, адзначаецца ў даследаванні Даследчага цэнтра ІПМ.

Ацэнкі прыросту рэальнага ВУП у цэнах красавіка 2020 г. даюць яго зніжэнне на 4.1% г / г (у залежнасці ад базавых цэн гэтыя ацэнкі могуць адрознівацца, напрыклад, нядаўна Даследчы цэнтр ІПМ публікаваў ацэнку падзення красавіцкага ВУП на 4.8% г / г, калі ён разлічваўся ў пастаянных цэнах 2014 г.).

А вось сектар «інфармацыя і сувязь» не проста вырас: у студзені-сакавіку было 7.4% г / г, а ў студзені-красавіку — ужо 9.8% г / г.

«Такі скачок выходзіць за рамкі таго, што можна было б чакаць ад «кавіднага» павелічэння попыту на паслугі Тэлекама, то-бок напэўна караніцца ў ІТ-сферы», — адзначаецца ў даследаванні.

Дэталізаваная статыстыка плацёжнага балансу за 1 кв. 2020 г. пакуль не апублікаваная, але крыніца гэтага росту цалкам зразумелая, лічаць даследнікі.

Транспартныя і турыстычныя паслугі павінны былі прасесці вельмі істотна, бо іх удзельная вага ў экспарце паслуг у 2019 г. складала 41.7 і 9.4% адпаведна. Будаўнічыя паслугі падаюць ужо даволі даўно. «Такім чынам, павінна быць галіна, якая «выцягнула» экспарт паслуг — з такой задачай мог справіцца толькі сектар ІКТ», — падкрэсліваецца ў даследаванні.

Паводле ацэнак экспертаў, у 1 квартале 2020 года экспарт тэлекамунікацыйных, камп'ютарных і інфармацыйных паслуг склаў каля 0.64 млрд. долараў, дадаўшы амаль 30% г / г. Гэтага хапіла, каб кампенсаваць падзенне экспарту астатніх паслуг і забяспечыць рост сукупнага экспарту паслуг па выніках 1 кв. 2020 г. на 5.2% г / г (уклад экспарту тэлекамунікацыйных, камп'ютарных і інфармацыйных паслуг у прырост экспарту паслуг склаў 6.8 прац. пункта).

Асноўным драйверам росту экспарту паслуг ІКТ быў Парк высокіх тэхналогій. Яшчэ ў 2019 г. ПВТ забяспечваў 90% усяго экспарту камп'ютарных паслуг, 22.4% усяго экспарту паслуг, і 5.2% экспарту тавараў і паслуг.

Паводле Заўтра тваёй краіны

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: