Крама «Князь Вітаўт» у Берасці дасюль не працуе. Праверка працягваецца?

Яшчэ да 9 жніўня ў Брэсце падаткавая інспекцыя заявілася з праверкай у краму «Князь Вітаўт». І яна, нібыта, працягваецца.
Апячатаныя дзверы крамы “Князь Вітаўт”. Фота Яўгена Бяласіна

Апячатаныя дзверы крамы “Князь Вітаўт”. Фота Яўгена Бяласіна


Крама месціцца ў цэнтры горада каля помніка 1000-годдзю Берасця, на якім спаміж шасці статуй на цокалі стаіць і князь-пераможца Грунвальда. У краме вялікі выбар вышыванак, беларускіх сувеніраў і аздобы. У тым ліку тут багата гістарычна-нацыянальнай сімволікі: бел-чырвона-белых сцяжкоў ды сцягоў, гербаў “Пагоня”.
Дзверы крамы былі апячатаныя, супрацоўнікі і гаспадар, прадпрымальнік Алег Чапараў, засталіся фактычна без працы. “Мусім раз-пораз з’яўляцца ў падаткавую, то тую даведку патрабуюць, то гэту”, -- патлумачыў спадар Чапараў.

Я схадзіў да правяральшчыкаў, каб запытацца калі нарэшце змагу скарыстаць сертыфікат на тавар у краме “Князь Вітаўт”, які атрымаў на дзень народзінаў.

Намеснік начальніка аддзела аператыўных мерапрыемстваў Інспекцыі Міністэрства падаткаў і збораў па Брэсцкай вобласці Максім Грыцэвіч адмовіўся нешта патлумачыць, сказаўшы: “Не даю інтэрвью”.
А мне інтэрвью і без патрэбы было. Просты і ўцямны адказ, калі яны пакінуць краму ў спакоі і вернуцца ў берагі сваёй працы. На што спадар Грыцэвіч спаслаўся на начальніка аддзела Паўла Брылеўскага. Маўляў, ён загадаў, я толькі выконваю.

Звяртаюся праз газету. Спадар Павел Брылеўскі, ёсць шанец стаць хай сабе не Героем Беларусі, проста паказаць нармальнасць на месцы службы.
Фота Яўгена Бяласіна

Фота Яўгена Бяласіна


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: