Прэзідэнт Літвы прапанаваў меры па блакаванні электраэнергіі з БелАЭС

Прэзідэнт Літвы Гітанас Науседа прапануе новыя меры для таго, каб не пускаць у Літву электраэнергію з Беларускай АЭС (БелАЭС), якая будуецца ў Астраўцы.

Gitanas Nausėda© DELFI / Kiril Čachovskіj

«Імпарт электраэнергіі, вырабленай спосабам, небяспечным для навакольнага асяроддзя і грамадства Літвы, уяўляе пагрозу нашай нацыянальнай бяспецы. Таму неабходна ўжо зараз распачаць дадатковыя меры, якія б абмежавалі магчымасці траплення такой электраэнергіі на тэрыторыю Літвы», — цытуе словы Науседы прэс-служба літоўскага прэзідэнта.

Папраўкі да закона прадугледжваюць магчымасць неадкладнага анулявання дазволаў на імпарт электраэнергіі з трэціх краін, дзе атамная станцыя прызнана небяспечнай з самага пачатку яе дзейнасці, і адмовы ў выдачы новых.

Акрамя таго, Дзяржаўная служба рэгулявання энергетыкі зможа прасіць камісію, якая правярае здзелкі стратэгічных кампаній, праверыць імпарцёраў электраэнергіі, і калі будуць устаноўлены выпадкі таго, што яны ўяўляюць пагрозу нацбяспецы краіны, служба зможа адразу ж спыніць дазвол.

У 2017 годзе літоўскі парламент прызнаў, што БелАЭС з'яўляецца небяспечнай і ўяўляе пагрозу нацыянальнай бяспецы, навакольнаму асяроддзю і грамадскаму здароўю Літвы. Таксама быў прыняты закон, які забараняе закупку электраэнергіі з небяспечных станцый. Беларусь адхіляе прэтэнзіі Літвы пра тое, што станцыя з'яўляецца небяспечнай.

Мінск сцвярджае, што ядзернае паліва для першага рэактара станцыі будзе дастаўлена да канца гэтага года, а сама станцыя будзе запушчана ў студзені 2020 года.

delfi.lt


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!