Украіна адбірае нафтапрадуктаправод у беларускага алігарха

Рада нацыянальнай бяспекі і абароны Украіны даручыла Кабінету міністраў прыняць неабходныя меры для захавання і эксплуатацыі часткі нафтапрадуктаправодаў агульнай працягласцю 1433 км, якія праходзяць праз тэрыторыю Украіны. Пра гэта паведамляе прэс-служба Офіса прэзідэнта Уладзіміра Зяленскага. Па сутнасці, пастаўлена задача вярнуць у дзяржаўную ўласнасць нафтапрадуктаправод «Самара — Заходні напрамак», які з 2019 года на 51% належаў беларускаму алігарху Мікалаю Вараб'ю.

«Кабмін павінен неадкладна вызначыць цэнтральны орган выканаўчай улады, адказны за захаванне і эксплуатацыю часткі нафтапрадуктаправодаў, і прыняць меры для забеспячэння абароны эканамічных інтарэсаў дзяржавы», — дадалі ў прэс-службе.

Як патлумачыў сакратар РНБА Аляксей Данілаў, гаворка ідзе пра кампанію «ПрыкарпатЗахадтранс», якая эксплуатуе ўчастак нафтапрадуктаправода «Самара — Заходні напрамак». Ён прызначаны для прапампоўвання дызельнага паліва з Расіі і Беларусі для Украіны і транзіту ў Еўропу.

Адзначаецца, што РНБА прыняла рашэнне аб прыняцці неадкладных мер «для вяртання дзяржаўнай маёмасці народа Украіны».

Таксама праваахоўным органам пастаўлена задача правесці высвятленне абставінаў, пры якіх дзяржаўная ўласнасць аказалася ў прыватных руках.

Акрамя таго, РНБА ўвяла санкцыі супраць народнага дэпутата ад фракцыі «Апазыцыйная платформа — За жыццё» Віктара Медведчука і яго жонкі Аксаны Марчанка з-за фінансавання тэрарызму (арт. 258-5 КК Украіны).

Адзначым, што працу нафтапрадуктаправода «ПрыкарпатЗахадтранс» звязваюць з Медведчуком як лабістам расійскіх інтарэсаў, паколькі магістраль транспартуе рэсурсы дзяржкампаніі «Раснафта».

У сваю чаргу, у палітычнай партыі АПЗЖ, сустаршынёй якой з'яўляецца Віктар Медведчук, заяўлялі, што палітык не звязаны з нафтапрадуктаправодам.

Дырэктар кансалтынгавай групы «А-95» Сяргей Куюн лічыць, што Расія спыніць падачу дызпаліва па «трубе» на тэрыторыю Украіны.

Нядаўна былой намесніцы дырэктара ўкраінскага Інстытута азотнай прамысловасці і прадуктаў арганічнага сінтэзу ўручылі падазрэнне ў злоўжыванні службовымі паўнамоцтвамі. Гэтая справа звязана з перадачай ва ўласнасць кампаніі «ПрыкарпатЗахадтранс» часткі магістральнага нафтапрадуктаправода «Самара — Заходні напрамак», гаворыцца ў паведамленні Нацыянальнага антыкарупцыйнага бюро Украіны (НАБУ). Паводле следства, у жніўні 2017 года падазраваная склала загадзя ілжывую выснову, на падставе якой гаспадарчы суд у Роўна адмовіўся прызнаць права ўласнасці Украіны ў частцы нафтапрадуктаправода «Самара — Заходні напрамак».

На падставе рашэння суда кантроль над часткай трубаправода перайшоў кампаніі «ПрыкарпатЗахадтранс».

У НАБУ заявілі, што трубаправод быў пракладзены ў часы СССР і павінен быў перайсці ў кіраванне Украіны. Аднак «дачка» расійскай кампаніі «Транснефть» не перадала трубаправод дзяржаве.

У сакавіку 2016 года нафтапрадуктаправод «ПрыкарпатЗахадтранс» адышоў швейцарскай кампаніі International Trading Partners AG грамадзяніна Германіі Анатоля Шэфера, якога звязваюць з «кумам Пуціна» Віктарам Медведчуком. У красавіку 2019 года 51% «ПрыкарпатЗахадтранса» былі прададзеныя беларускай кампаніі «Нафтабітумны завод» Мікалая Вараб'я. У канцы 2020 года беларускі алігарх трапіў пад санкцыі Еўрасаюза. Кампаніямі сталі валодаць яго менеджары.

Палітычныя эксперты называюць гэтую справу часткай стратэгіі ўкраінскіх улад па ціску на прарасійскага палітыка Віктара Медведчука. Нядаўна ва Украіне было спынена вяшчанне трох тэлеканалаў, якія кантралююцца паплечнікам Медведчука Тарасам Казаком.

tut.by

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: