Улады ўзяліся за аптэкі, якія паднялі кошты праз ПДВ

Чыноўнікі маюць намер працягнуць займацца цэнаўтварэннем на тавары, каб не стварыць на рынку дэфіцыт і не дапускаць неабгрунтаванага росту цэн. Гэта вынікае з паведамленняў на сённяшняй сустрэчы Аляксандра Лукашэнкі і кіраўніка КДК Васіля Герасімава. Нагадаем, чыноўнікі паднялі з 1 студзеня ПДВ на многія прадукты, лекі, медвырабы, дзіцячыя тавары, з-за чаго, нягледзячы на іх аптымістычныя прагнозы, выраслі рознічныя цэны.

Фота Вадзіма Заміроўскага

«Самым жорсткім чынам трэба спыняць». Пра кошты на лекі


Аляксандр Лукашэнка адзначыў на сустрэчы, што было прынята рашэнне ўрада па спыненні неабгрунтаванага росту цэн.

— 10% ПДВ. Што такое 10%? Гэта нішто. Але пад гэта ўсе пачалі падымаць цэны, — адзначыў Лукашэнка.

— Некаторыя на 30%, — удакладніў Васіль Герасімаў.

— Так. Значыць, самым жорсткім чынам трэба спыняць людзей. Гэта ад вытворцы да спажыўца. Мы павінны бачыць і аптавікоў, і розніцу павінны бачыць. Але самае галоўнае — лекі. Мы не павінны дазволіць рознага роду ачумелым нажывацца на бедах людзей. Ніхто не прыйшоў і не прынёс капейку з іх для таго, каб падтрымаць лячэнне ад кавіда. Ніхто, толькі дзяржава. Ужо мільярд долараў на гэта з усіх крыніц краіна затраціла. Што, нехта прыйшоў з уласнікаў аптэк і іншых нейкія грошы даў? Ніхто не даў, — сказаў Аляксандр Лукашэнка.

— Ну, у нас 50% дзяржаўных аптэк, 50%, прыкладна, прыватных. Калі ў пачуццё не прывядзем прыватнікаў, ну што ж, тады будуць працаваць дзяржаўныя аптэкі. Але мы не можам дазволіць на здароўі людзей нажывацца. Таму лекі — на асаблівы кантроль, — заявіў Лукашэнка.

Праз рост ПДВ цэны выраслі ў многіх аптэках (калі не ва ўсіх), у тым ліку і ў дзяржаўных.

«А вось масла — хай расце любымі тэмпамі цана?» Пра планы па цэнаўтварэнні на тавары

Лукашэнка лічыць, што трэба звяртаць увагу на цэнаўтварэнне не толькі ў дачыненні да тавараў паўсядзённага попыту. «Мы павінны іх бачыць. Гэта ж не справа, што мы там 60 пазіцый ўзялі пад кантроль. Ведаеце, малако ўзялі пад кантроль, будзем прытрымлівацца. А вось масла — хай расце любымі тэмпамі цана? — сказаў Лукашэнка. — А што, нашы людзі масла не ўжываюць? Таму і тут трэба паглядваць на цэнаўтварэнне. Трэба выпрацаваць у глабальным плане палітыку цэнаўтварэння, каб гэта нармальна выглядала, каб не рэтраградамі нейкімі былі. Каб сапраўды дэфіцыт не стварыць, але і каб людзі бачылі, што няма неабгрунтаванага росту цэн».

«Людзі выдатна ўсё разумеюць. У Беларусі кожны разумее, што такое цэны і цэнаўтварэнне. Таму разумна, без перагібаў мы павінны падысці да гэтага пытання», — адзначыў Лукашэнка.

Паводле яго слоў, КДК у пытанні кантролю над цэнаўтварэннем, вядома, не павінен бегчы наперадзе прафсаюзаў, дэпутатаў, МАРГ. «Але ўсё-ткі нейкую канцэптуальную ролю вы павінны граць. Вы павінны аналізаваць і бачыць, што трэба прадпрымаць у плане цэнаўтварэння», — сказаў Аляксандр Лукашэнка.

Пра пасярэднікаў у гандлі

«Яшчэ адзін напрамак, па якім мы павінны вельмі сур'ёзна папрацаваць (гэта на Усебеларускім народным сходзе мы пра гэта казалі), — пасярэдніцтва. Пасярэднікі спрыяюць павышэнню цаны тавару адсоткаў да 30, а то часам і больш у асобных пазіцыях. Нам такое пасрэдніцтва не трэба. І трэба выключыць усялякае пасярэдніцтва ўнутры Беларусі. Што гэта за парадак такі: я купляю тавар за плотам — і мне яшчэ нейкі патрэбны пасярэднік? Непатрэбныя ніякія пасярэднікі. Тут трэба ўнесці адпаведную прапанову», — заявіў Лукашэнка.

Коратка пра тое, што адбылося ў гэтым годзе на фармацэўтычным рынку

У Беларусі са студзеня змянілі стаўкі падатку на дададзеную вартасць на ўвоз і продаж лекаў і медвырабаў, а таксама сыравіну і матэрыялы для іх вытворчасці. З гэтага часу тыя партыі тавару, якія ўвозіліся ў краіну, павінны былі абкладацца ПДВ у 10%, а на ўвезеныя да гэтага года лекі і медвырабы трэба было перагледзець цэны да 1 лютага. У аптэчных сетках распавядаюць, што ўжо ўключаюць ПДВ у 10% у рознічныя цэны на новыя партыі лекаў ад пастаўшчыкоў.

Пры гэтым міністр па падатках і зборах Сяргей Налівайка прагназаваў, да прыкладу, што росту цэн з-за павышэння ставак ПДВ, на яго думку, не адбудзецца.

МАРГ і Міністэрства аховы здароўя толькі 1 лютага апублікавалі рэкамендацыі аптэкам, як прымяняць павялічаны ПДВ на лекі і медвырабы. Калі коратка, то ведамствы «рэкамендавалі» знізіць аптовыя і гандлёвыя надбаўкі і ладзіць зніжкі. У адваротным выпадку, абяцалі ўстанавіць столь па гранічных рознічных цэнах.

Праз тры тыдні ўрад увёў істотныя абмежаванні па росце цэн на некаторыя з іх. У спісе аказалася 50 пазіцый. Сярод іншага, гэта амаксіцылін, азітраміцын, анальгін, арпетол, ксіліт, амепразол, эсенцыкапс пэўных вытворцаў. Так, да канца лютага вытворцам, пастаўшчыкам і гандлю забаранілі падымаць цэны, а з 1 сакавіка — не больш за чым на 0,2% у месяц.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: