Выпрацоўванне энергіі на БелАЭС можа аднавіцца на наступным тыдні

Першы блок Беларускай АЭС (складаецца з двух блокаў па 1,2 ГВт), які 8 лістапада спыніў падачу электраэнергіі ў сетку, можа зноў пачаць выпрацоўку на наступным тыдні. Папярэдняя прычына спынення — паломка электратэхнічнага абсталявання замежнай вытворчасці. Што здарылася на станцыі і як інцыдэнт паўплывае на працэс пуску, "Коммерсанту" распавёў віцэ-прэзідэнт «Атамбудэкспарта», кіраўнік праекта будаўніцтва БелАЭС Віталь Палянін.
Vk / РУП "Беларуская АЭС"

Vk / РУП "Беларуская АЭС"

Па словах Віталя Паляніна, 8 лістапада, блок быў няпланава адключаны ад сеткі дзеяннем электрычнай абароны, пры гэтым усе праектныя алгарытмы і аўтаматыка блока адпрацавалі без заўваг: рэактарная ўстаноўка засталася на магутнасці, турбагенератар безаварыйна аўтаматычна пастаўлены на валапаворот.

Кіраўнік праекта будаўніцтва БелАЭС запэўнівае, што сітуацыя не крытычная, а абсалютна рабочая для гэтага этапу ўводу блока ў эксплуатацыю. «Папярэдне было выяўлена, што з ладу выйшлі трансфарматары напругі з вымяральнай схемы абароны блочнага трансфарматара ў выніку ўнутранага кароткага замыкання. Абсталяванне гэта італьянскай вытворчасці, цяпер мы мяняем трансфарматары на расійскія з запасаў канцэрна «Росэнергоатом». Ідзем па плане: упэўнены, што ў бліжэйшыя дні завершым усю працу, уключаючы мантаж і неабходныя выпрабаванні. Уключыць блок у сетку плануем ў пачатку наступнага тыдня», — сказаў Віталь Палянін.

Ён дадае, што такія выпадкі ўжо былі ў гісторыі расійскай атамнай энергетыкі. На расійскіх АЭС былі выкананыя пэўныя мерапрыемствы, частка гэтых жа мерапрыемстваў былі выкананы і тут, на першым энергаблоку БелАЭС, што, па словах Паляніна, дазволіла пазбегнуць больш сур'ёзных наступстваў.

«Радыяцыйны фон на пляцоўцы ў норме, па міжнароднай шкале МАГАТЭ гэты інцыдэнт мае нулявы ўзровень. На гэтым этапе ўводу блока ў эксплуатацыю выпрацоўка электраэнергіі не грае вырашальную ролю, галоўнае — праверыць працу абсталявання і сістэм на ўсіх рэжымах працы энергаблока», — зазначыў Віталь Палянін.

Ён падкрэсліў, што найбольш верагодная прычына таго, што адбылося — якасць вырабу абсталявання. Да ядзернай і радыяцыйнай бяспекі гэты інцыдэнт не мае ніякага дачынення. Гэта звязана толькі са спыненнем выпрацоўкі электраэнергіі.

Па словах Паляніна, замена трансфарматараў не паўплывае на графік вываду блока ў доследна-прамысловую эксплуатацыю.

«Мы знаходзімся на этапе энергопуска і ўсё роўна планавалі правесці неабходныя работы для даводкі асноўнага абсталявання па выніках пробных пускаў на пачатковым яго этапе. Нядаўна вывелі турбагенератар на намінальныя абароты, папрацавалі ў сетцы, у выніку чаго выявілі некаторыя адхіленні ў рабоце абсталявання машыннай залы, якія нам трэба давесці да неабходных параметраў. Гэта нармальная наладачная працэдура, калі падчас першых уключэнняў даводзіцца некалькі разоў спыняцца і рабіць неабходныя дапрацоўкі. Адзін тыдзень ніякім чынам не адаб'ецца на агульным графіку. Мы ўпэўненыя, што ў першым квартале 2021 года блок перадамо беларускім калегам».

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: