З Беларусі ва Украіну стала лётаць утрая больш пасажыраў

Пасажырапаток «Белавія» ў накірунку Беларусь — Украіна вырас з 25 кастрычніка прыкладна ў тры разы. Пра гэта журналістам паведаміў намеснік генеральнага дырэктара па маркетынгу і знешнеэканамічнай дзейнасці кампаніі Ігар Чаргінец.



«Цяпер, з улікам дадання частоты ў Кіеў і адкрыццём рэйса ў Адэсу ў лістападзе, пасажырапаток ў Украіну вырас прыкладна ўтрая. Сёння мы адкрываем рэйс у Харкаў. Думаю, лік пасажыраў у напрамку Беларусь — Украіна будзе павялічвацца і далей», — цытуе намесніка кіраўніка авіякампаніі БелТА.

У цяперашні час, адзначыў Ігар Чаргінец, запаўняльнасць рэйсаў у Кіеў вельмі высокая. «Адэса выйшла амаль на такі жа ўзровень, хоць спачатку было крыху горай. А зараз будзем шчыльна займацца Харкавам», — канстатаваў намеснік гендырэктара.

«Белавія» з 22 снежня мае намер адкрыць чацвёрты штодзённы рэйс паміж Мінскам і Кіевам у Міжнародны аэрапорт Кіеў (Жуляны). «Мы назіраем прырост транзітных пасажыраў, і, каб задаволіць існуючы попыт, было прынята рашэнне аб увядзенні чацвёртага рэйсу ў Міжнародны аэрапорт Кіеў. Выбар аэрапорта абумоўлены тым, што ён знаходзіцца непасрэдна ў межах горада, што дазваляе шматлікім пасажырам эканоміць час на шляху ў аэрапорт», — тлумачыў раней генеральны дырэктар кампаніі.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: