7 гісторый пра беларусаў, якіх здзівілі «падаткам на дармаедства»

Жыхарам Беларусі працягваюць прыходзіць лісты з падатковай аб выплаце збору на фінансаванне дзяржаўных выдаткаў. «Салідарнасць» сабрала некалькі паказальных гісторый, якія адбыліся за апошні час.

Фота: http://euroradio.fm/

Фота: http://euroradio.fm/


Раней намеснік міністра фінансаў прызнаў, што «падатак на дармаедства» — не самы эфектыўны крок.

«Дармаед» з Бярозы: працаваў у Расіі, але грошы не атрымаў

Пра сітуацыю, у якую трапіў 59-гадовы Анатоль Альхоў, на днях паведаміла Радыё Рацыя. Жыхар Бярозы застаўся дома без працы і паехаў у Расію на заробкі. Але там яго двойчы падманулі. Заробленыя яшчэ ў жніўні грошы ён да гэтага часу не атрымаў. У іншага працадаўцы за месяц цяжкай працы ледзь удалося атрымаць частку зарплаты, каб вярнуцца дадому. Цяпер працаўнік з жонкай вымушаныя жыць на яе пенсію.

Ліст з прапановай заплаціць «падатак на дармаедства» ў мужчыны выклікаў абурэнне.

— 3,6 млн я павінен заплаціць. Адкуль я вазьму гэтыя грошы? Я — не начальнік, я красці не ўмею, я ўсё жыццё працаваў сумленна.

«Дармаед» з Гомеля: запатрабавалі падатак у афіцыйна працуе

Леанід Судаленка афіцыйна працуе прававым інспектарам Беларускага незалежнага прафсаюзу РЭП, але гэта ад патрабавання заплаціць «падатак на дармаедства» яго не выратавала.

— Мабыць, мяне ніяк не могуць выкрасліць з нейкіх таемных спісаў, — сказаў Леанід Судаленка «Гомельскай вясне».

«Дармаед» з Магілёва: чаму павінны плаціць тыя, у каго няма прыбыткаў?

Аб гісторыі Андрэя з Магілёва распавёў TUT.BY. Ён працаваў эканамістам у прыватнай кампаніі, але яго ў ліку іншых скарацілі ў студзені 2015 года.

Малады мужчына актыўна спрабаваў знайсці працу з нармальнай заробкам, але безвынікова. Таму вымушаны быў ездзіць у Расію, але заробкі там былі не рэгулярнымі і няўстойлівымі. Маладой сям'і (у Андрэя ёсць жонка і дачка) ледзь хапала сродкаў на годнае жыццё.

Жыхар Магілёва не можа зразумець: дэкрэт быццам бы прымалі, каб «заплацілі тыя, хто мае «шэрыя» даходы, а атрымліваецца, што будуць плаціць тыя, у каго даходаў няма наогул».

«Дармаедка» з Магілёва: прылічылі да утрыманцаў па памылцы

Маладую маму Кацярыну Крупеніну прылічылі да дармаедаў, але, праўда, затым падатковыя інспектары прызналі памылку.

Кацярына другі год у дэкрэтным адпачынку, выхоўвае маленькую Дашу. Пасля прыходу апавяшчэння яе муж патэлефанаваў у падатковую, але там запатрабавалі асабістага візіту жанчыны. У выніку Кацярыне прыйшлося пакінуць дачку на суседку, каб асабіста прад'явіць пасведчанне аб нараджэнні дзіцяці, перадае АНТ.

«Дармаед» з Бабруйска: прыйшлося даказваць, што 5 гадоў вучыцца за мяжой

Жыхару Бабруйска Віктару прыйшлося даказваць, што яго сын навучаецца за мяжой, каб не плаціць «падатак на дармаедства». Адсталі ад мужчыны толькі пасля другога візіту ў падатковую інспекцыю, піша TUT.BY.

«Дармаед» з Рагачова: вінаваты ў тым, што не змог знайсці працу

42-гадовы будаўнік з Рагачова Аляксандр Антонаў, які не працаваў у 2015 годзе, адмовіўся выплачваць падатак на дармаедства, піша praca-by.info.

Зараз Аляксандр працуе на будоўлі, але ў мінулым годзе работу знайсці не змог. Мужчына лічыць прэзідэнцкі дэкрэт аб папярэджанні сацыяльнага ўтрыманства неканстытуцыйным і мае намер з дапамогай юрыста абскардзіць афіцыйнае патрабаванне ад падатковай.

«Дармаед» з Мінска: проста была занадта маленькая зарплата

У мінулым годзе 31-гадовая мінчанка Вольга працавала каля 8 месяцаў, але ўсё роўна трапіла ў плацельшчыкі збору на фінансаванне дзяржвыдаткаў, распавёў FINANCE.TUT.BY.

Вольга працавала мастаком на мінскім заводзе шасцерань, займалася афармленнем ўнутраных памяшканняў. З-за прастояў зарплата была маленькая — атрымлівала каля 1,2 млн старых рублёў. Затым звольнілася і працавала па дамове падраду ў прыватнай кампаніі: праводзіла вулічныя апытанні. Аплата за гэта была вельмі сціплая.

Гэтай восенню Вользе паведамілі, што яна з'яўляецца плацельшчыкам падатковага збору за няўдзел у фінансаванні дзяржвыдаткаў, паколькі на асноўным месцы прапрацавала менш 183 дзён, а па дамове падраду ў яе няма патрэбнай сумы.


Паводле gazetaby.com

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: