Аказваецца, ігуменя Гаўрыіла яшчэ подпісы супраць а.Ацемія збірала

Ігуменя Гаўрыіла, настаяцельніца гродзенскага жаночага манастыра, стала вядомай пасля цемрашальскага выступу на пралукашэнкаўскім форуме-канцэрце. Аднак яшчэ яна хацела збіраць подпісы за адхіленне архіепіскапа Гродзенскага і Ваўкавыскага Арцемія.
Ігуменя Гаўрыіла. Фота TUT.BY

Ігуменя Гаўрыіла. Фота TUT.BY


Айцец Арцемій у ліку першых праваслаўных святароў асудзіў гвалт. Вось яго зварот да кліру і паствы Гродзенскай дыяцэзіі:

«Мы з вамі перажываем цяжкі перыяд нашай гісторыі, ужо азмрочаны пралітай у выніку гвалту крывёю. Чаго, здавалася б, мы, у нашай мірнай і спакойнай Беларусі, не гатовыя былі чакаць ні пры якіх умовах. І, тым не менш, гэта здарылася.

І здарылася, відавочна, таму, што нельга гуляць з праўдай, перакручваць і крамсаць яе ва ўгоду палітычнай мэтазгоднасці. Бо праўда — гэта той каштоўнасны феномен і сэнсавая катэгорыя, за якой стаіць — БОГ! І калі праўда бярэцца ў двукоссі і лёгкім рухам рукі ператвараецца ў хлусню, то топчацца Той, Хто — бацька праўды! І на арэну выходзіць іншы бацька. Бацька хлусні. Якога, як мы ведаем з Слова Божага, клічуць – Д'ябал! І яшчэ мы аб ім ведаем, што «Ён быў чалавеказабойцам ад пачатку» (Ян. 8, 44).
 
Значыць, кроў ахвяр і цяжкія пакуты людзей у гэтыя дні-на сумленні тых, хто свядома сам забіваў, альбо прымушаў іншых забіваць праўду! Пра тое, што так нельга паступаць тым, хто лічыць сябе праваслаўным хрысціянінам, папярэджвалі нашы святары, якія заклікалі да іх сумлення і нагадвалі запаведзі Божыя! Але, на жаль, іх слухалі ў апошнюю чаргу.

Цяпер нам усім трэба будзе прайсці няпросты шлях пераадолення палітычнага крызісу і маральнага ачышчэння. Якога не бывае без шчырага і глыбокага пакаяння і якому нам усім прыйдзецца навучыцца! Каб мы змаглі прасіць прабачэння сабе і дараваць іншых!

І вопыт апошніх дзён, калі на вуліцы нашых гарадоў замест збітых мужоў, сыноў, братоў выйшлі іх жонкі, маці, сёстры — з кветкамі і ўсмешкамі, аказалася, што духоўны закон: «не будзь пераможаны злом, але перамагай зло дабром» (Рым. 12. 21) — працуе! Каханне вярнула мір і спыніла гвалт! Гэта не цуд! Я ўсяляк дзякую тым, хто знайшоў гэта дзіўнае рашэнне і заклікаю на вас дабраславенне Божае!

Веру, што любоў і мір дапамогуць усім нам вярнуць і праўду! Вярнуць у нашы душы, у нашы дамы і сем'і, у адносіны грамадства і дзяржавы. І праўда дазволіць нам усім вярнуць давер адзін да аднаго. Асабліва да тых, хто, маючы прысягу служыць беларускаму народу, неапраўдана жорстка ставіўся да яго ў гэтыя дні. Хай кветкі і ўсмешкі нашых выдатных дзяўчат і жанчын дапамогуць і вам вылечыцца ад таксінаў зла і агрэсіі!

Вечная памяць загінулым і суцяшэння іх родным і блізкім!

Хутчэйшага выздараўлення ўсім пацярпелым і свабоды тым, хто яе яшчэ чакае!

І хай будуць справядліва, сумленна і адкрыта расследаваныя ўсе факты падману, гвалту і жорсткасці, каб здзейснілася правасуддзе і перамагла праўда!»

Безумоўна, такая пазіцыя не магла не "ўстрывожыць" ігуменню Гаўрыілу (Глухаву), гэта ў манастыры настаяцельніцай якога яна з'яўляецца, пачаўся збор подпісаў супраць а. Арцемія.

Спачатку кіраўніцтва Рускай Праваслаўнай царквы ў Беларусі адмежавалася ад выступу Глухавай. Пасля Глухава папрасіла прабачэнне ва ўсіх, каго абразіў яе выступ. Словы прабачэнні ігумення Гаўрыіла выказала, размаўляючы з вернікамі, якія наведалі прастольнае свята манастыра.

Настаяцельніца Гродзенскга манастыра патлумачыла свае эмацыйныя выказванні "перажываннямі за лёс Радзімы і заклікала ўсіх імкнуцца да міру, згоды і любові".

Яшчэ пазней Мітрапаліт Мінскі і Заслаўскі Веніямін забараніў збор подпісаў супраць арцыбіскупа Арцемія. Пра гэта ён паведаміў у эфіры тэлеканала «Гродна Плюс».





Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: