Актывіста, які бараніў анархістаў ад пераапранутай міліцыі, асудзілі на тры гады

Суд Маскоўскага раёна Мінску асудзіў на 3 гады зняволення ў калоніі агульнага рэжыму мінчука Святаслава Барановіча, якога прызнаў вінаватым у нападзе на міліцыянта падчас леташняй сакавіцкай акцыі «Марш недармаедаў». паведамляе "Радыё Свабода".


Зала сустрэла прысуд воклічамі «Ганьба!»

Барановіч сказаў, што будзе абскарджваць прысуд. Людзі раілі яму змяніць адваката.

Пракурор прасіла для Барановіча 4 гады калоніі. На судзе Святаслаў Барановіч прызнаў сваю віну і папрасіў прабачэння ў міліцыянта Арцёма Паўлава, якога некалькі разоў ударыў. Але ён не пагадзіўся са следствам, што дакладна ведаў прыналежнасць пацярпелага да праваахоўных органаў.

У апошнім слове на судзе Барановіч заявіў:

«Мяне тут абвінавачваюць, быццам я нейкі злосны злачынца. Я па рэакцыі, інтуітыўна ўдарыў, але я не ведаў, што гэта быў супрацоўнік міліцыі. Я прашу ўлічыць, ці хаця б пазначыць, высокі суд, што я быў цвярозы, кантраляваў усе падзеі, не мог прычыніць зла супрацоўніку, які быў пры выкананні, і тое, што я не прадоўжыў збіваць чалавека. І паколькі сам пацярпелы не адчувае да мяне нічога, не жадае пакарання суровага, прашу суд паставіцца да мяне мякка, па-чалавечы. Усё ж мы ўсе людзі, беларусы, і для мяне ўсё роўныя. І сёння ён працуе ў міліцыі — але што рабіць, у яго праца такая. А тое, што я зрабіў, я раней казаў, я згодны, што ўчыніў злачынства. Але не думаў, што запатрабуюць 4 гады пазбаўлення волі, я не чакаў. Думаў, максімум 15 сутак дадуць. Хацеў бы прыняць да ўвагі, што я каюся і прыношу прабачэнні супрацоўніку, які пацярпеў ад мяне. У турме карысці ад мяне не будзе. Хацелася б быць на свабодзе».

Міліцыянт Арцём Паўлаў ад прэтэнзій да Барановіча, звязаных з кампенсацыяй маральнай шкоды, адмовіўся.

Першыя рэакцыі на прысуд: прызнаць Барановіча палітвязнем

Мікалай Статкевіч: «Калі адным словам, дык „Ганьба!“, але мы будзем 25 сакавіка на мітынгу пра гэта казаць і тады каментаваць гэты ганебны прысуд».

Павал Севярынец: «Мы заклікаем да грамадскай кампаніі салідарнасці з Барановічам, якога адназначна лічым палітвязнем. Тое, што ён ужыў гвалт адносна міліцыянта і ў гэтым прызнаўся ў судзе, для нас, удзельнікаў форуму „Свабоду палітвязням“, не ёсць прычынай не лічыць яго палітвязнем. Бо мы ўсе ведаем пра ціск, які аказваецца на падследнага пры такім абвінавачанні, і ведаем пра якасць абароны, бо сапраўды сумленных адвакатаў засталіся адзінкі. На маю думку, гэты працэс стаў яшчэ адным прыкладам залежнасці судовай сістэмы ад улады», — сказаў Свабодзе Павал Севярынец.

Грамадская актывістка Ганна Шапуцька сказала, што разам з іншымі праваабаронцамі накіруе ліст у Парламенцкую асамблею Рады Еўропы з заклікам разгледзець там справу Святаслава Барановіча і прызнаць яго палітвязнем.

Удзельнік Плошчы–2010, затрыманы ў кастрычніку 2017 году

Прадпрымальніка Святаслава Барановіча затрымалі ў кастрычніку 2017 году ў Мінску. Паводле следства, гэта ён у сакавіку некалькі разоў ударыў міліцыянта на грамадскім прыпынку каля плошчы Бангалор пасля завяршэння акцыі «Марш недармаедаў».

Следства выкарыстала відэа бойкі, на якім чалавек у чырвонай куртцы з надпісам «Беларускі бокс» наносіць некалькі ўдараў маладому чалавеку ў цывільным — як аказалася, амапаўцу Арцёму Паўлаву. На судзе Святаслаў Барановіч пазнаў сябе на відэа, але заявіў, што да канца не ўсведамляў, хто перад ім, а проста абурыўся, што гэты чалавек спрабуе затрымаць актывістаў анархісцкага руху. Пры гэтым, паводле паказанняў Барановіча на следстве, ён разумеў, што б’е міліцыянта. У судзе выступілі два сведкі, знаёмыя Святаслава Барановіча, якія паведамілі, што пасля «Маршу недармаедаў» Барановіч расказваў ім пра свой удзел у інцыдэнце.

Абаронца Святаслава Барановіча заклікаў суд абмежавацца пакараннем, не звязаным з абмежаваннем волі, і звяртаў увагу на тое, што Барановіч раскаяўся, а раней добра характарызаваўся.

«Прашу даць апошні шанец чалавеку, не пазбаўляць яго волі», — казаў адвакат.

Святаслаў Барановіч вядомы таксама як удзельнік Плошчы–2010, якога адным з апошніх судзілі за ўдзел у масавых акцыях пратэсту супраць несумленных вынікаў прэзідэнцкіх выбараў 2010 года. Восенню 2011 года Барановіча асудзілі на 3 гады абмежавання волі без накіравання ва ўстанову адкрытага тыпу.

З кастрычніка 2017 года Святаслаў Барановіч знаходзіцца ў СІЗА на Валадарскага, паведаміла карэспандэнту “Радыё Свабоды” ягоная сястра Наталля.

Святаслаў Барановіч — прадпрымальнік, займаецца будаўнічым бізнесам. «Пакуль ягоная фірма не працуе, няма каму ёй кіраваць», — сказала сястра Барановіча Наталля.

15 сакавіка 2017 году пасля «Маршу недармаедаў» сілавікі  спрабавалі затрымаць групу анархістаў у масках, калі тыя садзіліся ў тралейбус, каб з’ехаць з месца правядзення акцыі. Узнікла бойка, пасля якой на іншых прыпынках некаторых удзельнікаў бойкі міліцыя затрымала, ім прысудзілі адміністрацыйныя арышты. У інтэрнэт трапіла відэа, знятае падчас бойкі. Цяпер следчыя сцвярджаюць, што зняты на ім чалавек у чырвонай куртцы, які ўжывае сілу ў дачыненні да міліцыянтаў у цывільным, — гэта Святаслаў Барановіч.

 

Хочаце ведаць больш? Сачыце за нашымі публікацыямі ў Telegram і Facebook!