Актывіста, які прыкаваў сябе ланцугом, ноч трымалі ў ІЧУ і РАУСах, а зраніцы асудзілі

Мікалая Саляніка, якога забралі з будынка Гарадзенскага абласнога суда людзі ў чорным і з маскамі на тварах, цэлую ноч утрымлівалі ў РАУСах і ІЧУ. І гэта нягледзячы на тое, што Салянік сардэчнік і мае інваліднасць другой групы.
harodniaspring.org

harodniaspring.org

Яму тры разы выклікалі хуткую дапамогу, адзін раз у будынак суда, другі раз у РАУС Ленінскага раёна Гродна, трэці раз у ІЧУ, бо актывісту было кепска. Але не адпусцілі. А зранку яго завезлі зноў у РАУС Кастрычніцкага раёна, куды прыехаў суддзя, і там на месцы асудзілі за хуліганства і прысудзілі яму 15 базавых велічынь штрафу.

Я ім казаў, што не ўзяў усіх лекаў, якія мне трэба піць, – тлумачыць Мікалай Салянік. – Бо я, як інвалід другой групы, не мог сабе ўявіць, што мяне закрыюць у ІЧУ ў парушэнне заканадаўства. Але і гэта не падзейнічала. У мяне не было харчавання. Я не мог спаць, бо мяне ўвесь час перамяшчалі з месца на месца, мне рабілася некалькі разоў кепска, і тады выклікалі хуткую. Але не адпусцілі. Напачатку мяне завезлі ў РАУС Кастрычніцкага раёна. Пасля ў РАУС Ленінскага. Як прайшло тры гадзіны пасля затрымання, я настойваў, каб мне хоць бы растлумачылі, што яны робяць, бо далей утрымліваць мяне незаконна. Але не адпусцілі. Як мяне прывезлі ў ІЧУ, я зноў сказаў, што гэта незаконна. Там доўга разбіраліся, відаць не хацелі мяне браць. Але каля трох ночы, відаць, ім прывялі добрыя аргументы, чаму мяне трэба закрыць у ІЧУ. А ўжо ў сем ранку павезлі ў Кастрычніцкі РАУС, куды і прыехаў суддзя. А я ўжо быў без сілаў, і памятаю, што пакаралі мяне яшчэ на 15 базавых у дадатак да 45 ранейшых. Моцна ў нас караюць за любоў да радзімы!

Нагадаем, што Мікалая Саляніка забралі з будынку Гродзенскага абласнога суда, дзе быў разгляд яго скаргі на рашэнне Кастрычніцкага суда Гродна, які асудзіў яго за акцыю «За Незалежнасць» на 45 базавых велічынь штрафу. У судзе Салянік прыкаваў сябе ў знак пратэсту ланцугом да стойкі, абвесціў галадоўку, пакуль не будзе справядлівага суда. Адтуль яго забралі людзі з маскамі на тварах пасля таго, як ланцуг перакусілі адмысловай прыладай супрацоўнікі МНС.

Цяпер Мікалай Салянік прыехаў дахаты.

Паводле harodniaspring.org

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Грамадства: галоўнае

Больш цікавага на «Новым Часе»: