Акумулятарны завод у Брэсце прызналі адпаведным патрабаванням экалагічнай бяспекі і эксплуатацыйнай надзейнасці

Прыёмачная камісія па ўводзе ў эксплуатацыю акумулятарнага завода пад Брэстам завяршыла працу. Прадпрыемства атрымала поўны пакет дакументаў, якія пацвярджаюць адпаведнасць патрабаванням экалагічнай бяспекі і эксплуатацыйнай надзейнасці. Пра гэта 15 сакавіка паведаміла прэс-служба ТАА «Акумулятарны Альянс».
Пусканаладачныя работы на заводзе стартавалі ў пачатку кастрычніка мінулага года. Спецыялісты правялі індывідуальныя выпрабаванні і комплекснае апрабаванне ўсяго тэхналагічнага абсталявання і інжынерных сетак пры працы ў штатным рэжыме пад поўнай нагрузкай.

З 5 кастрычніка 2020 года па 1 сакавіка 2021-га адабралі больш за 210 спроб і вымярэнняў выкідаў забруджвальных рэчываў ад крыніц, размешчаных на прадпрыемстве.

«Вынікі вымярэнняў паказалі адпаведнасць фактычных канцэнтрацый выкідаў, са шматразовым запасам, устаноўленым прадпрыемству нарматывам дапушчальных выкідаў, асабліва па выкідах свінцу і яго злучэнняў, а таксама сернай кіслаты», — паведамляе прэс-служба прадпрыемства.

Акрамя таго, кажуць на прадпрыемстве, работнікі абласнога цэнтра гігіены і эпідэміялогіі правялі лабараторныя выпрабаванні фізічных і хімічных фактараў вытворчага асяроддзя на ўсіх працоўных месцах прадпрыемства. Па выніках выпрабаванняў пацверджана поўная адпаведнасць умоў для персаналу патрабаванням санітарна-эпідэміялагічнага заканадаўства.

Нагадаем, што летам 2020-га Аляксандр Лукашэнка на сустрэчы з супернікамі будаўніцтва акумулятарнага завода паабяцаў, што лёс прадпрыемства вырашыць мясцовы рэферэндум. Пасля гэтага прайшло некалькі сустрэч актывістаў з уладамі.

Апошні раз праціўнікі завода сустракаліся 12 кастрычніка з намеснікам старшыні Брэсцкага аблвыканкама Генадзем Барысюком. Ён падкрэсліў, што ўлада не адмаўляецца ад сваіх абавязацельстваў па правядзенні рэферэндуму, пісала газета «Заря».

Брэсцкі праваабаронца Раман Кісляк паведаміў TUT.BY, што цяпер актыўна ідзе праца па правядзенні мясцовага рэферэндуму пра лёс завода.

— Ужо сфарміраваная ініцыятыўная група з 14 чалавек і пададзеныя дакументы на яе рэгістрацыю ў Цельмінскі сельвыканкам. Таксама сабралася больш за 40 чалавек у ініцыятыўнай групе па Брэсце. Мы маем намер сабраць па горадзе як мага больш членаў у ініцыятыўную групу і падаць дакументы на рэгістрацыю ў Брэсцкі гарвыканкам. Наша прапанова — правесці мясцовы рэферэндум на тэрыторыі Брэста і Цельмінскага сельсавета, дзе размяшчаецца прадпрыемства. Пытанне на галасаванне мы прапануем такое: «Ці згодныя вы на размяшчэнне і эксплуатацыю на тэрыторыі Брэсцкага раёна ў непасрэднай блізкасці да горада Брэста завода свінцова-кіслотных акумулятарных батарэй ТАА "Акумулятарны альянс" (былое ТАА "АйПауэр")». На днях мы павінны атрымаць адказ ад Цельмінскага сельвыканкама з нагоды рэгістрацыі ініцыятыўнай групы.


Нагадаем, будаўніцтва акумулятарнага завода выклікала хвалю незадаволенасці ў жыхароў Брэста і некалькіх вёсак Брэсцкага раёна. Яны лічаць, што прадпрыемства пагражае іх здароўю.

14 чэрвеня 2019 года Брэсцкі аблвыканкам апублікаваў на сваім сайце распараджэнне губернатара Анатоля Ліса аб прыпыненні будаўніцтва акумулятарнага завода «да ліквідацыі выяўленых парушэнняў».

22 траўня 2020 года акумулятарны завод пад Брэстам ТАА «АйПауэр» выведзены з-пад кантролю Групы кампаній «1AK-GROUP» — прадалі 100% доляй у статутным фондзе ТАА «АйПауэр». У выніку завод атрымаў найменне ТАА «Акумулятарны Альянс». 85% долі кампаніі належаць Сяргею Кагановічу, а 15% — Дзмітрыю Баскаву.

25 верасня 2020-га распараджэнне старшыні Брэсцкага аблвыканкама Анатоля Ліса аб прыпыненні будаўніцтва акумулятарнага завода прызнана страціўшым сілу.

Паводле tut.by

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: