Алена Леўчанка пракаментавала крымінальную справу супраць Герасімені

«Беларусы ўжо выдатна ўсё разумеюць».
Баскетбалістка Алена Леўчанка ў каментары Sport24.ru выказалася на тэму заведзенай крымінальнай справы на трохразовага прызёра Алімпійскіх гульняў па плаванні і кіраўніка Беларускага фонду спартыўнай салідарнасці Аляксандру Герасіменю, а таксама выканаўчага дырэктара фонду Аляксандра Апейкіна.

«Не ўпэўненая, ці ведае гісторыя прыклады, калі супраць шматразовага прызёра Алімпіяд і чалавека, які столькі зрабіў для сваёй краіны, заводзяць крымінальную справу па абсалютна надуманай падставе. Зараз у Беларусі можна ўзбуджаць справы колькі заўгодна і супраць каго заўгодна. Але ўсё гэта не мае ніякага сэнсу, таму што гэта робяць чыноўнікі і людзі, якіх беларускі народ не выбіраў і ня надзяляў уладай.

Яны, як заўсёды, спрабуюць паказаць сваю сілу і моц і толькі запалохваюць, але з юрыдычнага пункту гледжання ўсе гэтыя справы і абвінавачванні выглядаюць сьмешнымі. Аб якой адказнасці можна наогул гаварыць, калі ў краіне прававы дэфолт? Немагчыма нават сур'ёзна пра гэта казаць і ставіцца да гэтага, калі шчыра. Такое адчуванне, што гэтая сістэма пачне сябе з'ядаць, і яна ўжо гэта робіць.

Гэтыя людзі ў пачатку жніўня прыйшлі да ўлады, нягледзячы на ​​тое, што народ пратэставаў супраць гэтага і заяўляў, што іх ніхто не выбіраў. Яны самі надзялілі сябе гэтай уладай. Са жніўня прайшло 8 месяцаў. І вось што пазітыўнага яны зрабілі за гэты час? Крымінальныя справы заводзяцца пастаянна, а што добрага яны паспелі здзейсніць? Можа, што-небудзь пабудавалі, пачалі развіваць? Нічога! Трэба ж народу неяк дапамагаць, а ўсё, што мы бачым і чытаем, у тым ліку і з дзяржаўных крыніц: гэта тое, як яны заводзяць крымінальныя справы, нешта абяцаюць, садзяць і караюць людзей. Усе беларусы ўжо выдатна ўсё разумеюць. Як Аляксандр Апейкін і сама Саша з гумарам да гэтага ставяцца. Таму можа ўжо час зрабіць што-небудзь станоўчае і добрае? Калі яны, вядома, умеюць гэта рабіць», — сказала Леўчанка.

Нагадаем, 2 красавіка стала вядома, што Галоўным следчым упраўленнем Следчага камітэта ўзбуджаная крымінальная справа ў дачыненні да Аляксандры Герасімені і Аляксандра Апейкіна.

tut.by

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: