Беларускія кніжкі — украінскім сябрам (фота)

Кніжкі на беларускай мове падараваныя бібліятэцы Дома культуры сяла Залісы Забалоццеўскага пасялковага савету Ратнаўскага раёна Валынскай вобласці Украіны ад Дзівінскага сельвыканкама Кобрынскага раёна на Берасьцейшчыне.
Галоўны рэдактар Ратнаўскай раённай газеты «Ратнівщина» Дмітро Мороз знаёміцца з бібліятэчкай беларускай літаратуры

Галоўны рэдактар Ратнаўскай раённай газеты «Ратнівщина» Дмітро Мороз знаёміцца з бібліятэчкай беларускай літаратуры

Падзея адбылася 14 студзеня ў Залісах пад час фэсту вертэпаў і калядак «Калядная зорка». Фэст — з мерапрыемстваў дзеля абмену вопытам у вясковых суполках Украіны і Беларусі праекту «Праз вывучэнне культуры суседняга народу — да ўстойлівага партнёрства і паразумення» ў рамках Еўразвязаўскай праграмы тэрытарыяльнай супрацы краінаў Усходняга партнёрства «Беларусь-Україна».

Бібліятэчку склалі 50 кніжак мастацкай, у тым ліку дзцячай, навукова-папулярнай і даведачнай літаратуры. Сярод іх — кнігі выбраных твораў класікаў нацыянальнага прыўкраснага пісьменства Янкі Купалы, Якуба Коласа, Васіля Быкава, Алеся Адамовіча і Рыгора Барадуліна, казак Пётры Васючэнкі і Сяржука Вітушкі, паэтычны зборнік Анатоля Вярцінскага, бліскучае апавяданне Міхася Стральцова «Смаленне вепрука», а таксама даследаванне Аляксея Цітова «Геральдыка Беларусі», зборнік артыкулаў слыннага беларускага навукоўцы, доктара гістарычных навук Анатоля Грыцкевіча, ілюстраваныя альбомы пра шэраг старажытных гарадоў Беларусі і гістарычныя выданні для школьнікаў знанага айчыннага археолага і выбітнага дзеяча беларускага нацыянальнага Адраджэння Міхася Чарняўскага. 

Дарэчы, у ягонай кнізе «Дзесяць бітваў» згадваюцца падзеі 1362 году, калі войскі Вялікага Княства Літоўскага пад кіраўніцтвам вялікага князя Альгерда ў пабаявішчы на Сіняй Вадзе — прытоку Паўднёвага Бугу на поўдні Украіны адолелі татарскае войска пад кіраўніцтвам Хачыбея, Кутлубагі і Дзімітра. Дзякуючы гэтай перамозе, большая частка сучаснай Украіны была вызваленая ад дэспатыі Залатой Арды і ўвайшла ў склад ВКЛ.  

У кнізе выбраных твораў Янкі Купалы ўтрымліваецца ягоная паэма «Тарасова доля» — прысвячэнне бацьку ўкраінскай нацыі Тарасу Шаўчэнку, які сваёй творчасцю і жыццём увасобіў пакутны лёс суайчыннікаў, іхнія надзеі і памкненні скінуць кайданы тыраніі. Дарэчы, будучы паэт і мастак упершыню ўбачыў Беларусь 15-гадовым хлопчыкам — пакаёвым казачком штаб-ротмістра лейб-гвардыі ўланскага палка расейскага войска Паўла Энгельгарта, калі той у 1829 годзе па дарозе з Альшанаў у Вільню заязджаў у маёнтак свайго цесця — кобрынскага барона Рыгора Энгельгарта ў вёсцы Кустовічы на Кобрыншчыне і нейкі час жыў там з сям’ей і сваім прыгонным служкай.
Юныя артысты з Дзівіну хутка выйдуць на сцэну

Юныя артысты з Дзівіну хутка выйдуць на сцэну

Свае калядныя праграмы на фэсце паказалі жыхары сяла Залісы і аграгарадку Дзівіну, у тым ліку калектывы ўкраінскага дзіцячага духоўнага хору «Передзвін», створанага духоўнікам Залісаўскай сярэдняй школы з эстэтычным ухілам айцом Валянцінам (Кас’янчуком) разам з жонкай Таццянай, і Дзівінскай дзіцячай школы мастацтваў на чале з Святланай Куцэвіч.  

Трэба адзначыць, што фэст адбыўся ў толькі адноўленым Доме культуры Залісаў, што быў узведзены з дрэва ў 1952 годзе. На рэканструкцыю гэтага састарэлага будынку было выдаткавана каля 47 тысяч еўра, у тым ліку больш за 34 тысячы — у рамках праекту Еўразвязу.
Адноўлены будынак Дому культуры ў Залісах

Адноўлены будынак Дому культуры ў Залісах

Мясцовыя жыхары цёпла віталі ўдзельнікаў міжнароднага каляднага фэсту. У перапоўненай залі Дому культуры гучалі ўкраінская і беларуская мовы, духоўная і старадаўняя народная музыка. Узоры традыцыйнай культуры святкавання Калядаў ва ўкраінцаў і беларусаў засведчылі блізкасць і роднаснасць светаўспрымання і менталітэту народаў-суседзяў.
З днём Божага Нараджэння ўдзельнікаў фэсту віншуе духоўнік Залісаўскай школы, айцец Валянцін

З днём Божага Нараджэння ўдзельнікаў фэсту віншуе духоўнік Залісаўскай школы, айцец Валянцін


Упэўнены, што фэст у Залісах надоўга застанецца ў памяці гаспадароў і гасцей, як прыклад спрадвечнага братэрства ўкраінскага і беларускага народаў на нашым шляху да лепшай будучыні.  
Словы прывітання — ад старшыні Забалоццеўскага пасялковага савету Валерыя Свіржэўскага

Словы прывітання — ад старшыні Забалоццеўскага пасялковага савету Валерыя Свіржэўскага

Асобнай падзякі заслугоўваць арганізатары фэсту — каардынатар праекту, стараста сяла Залісы Віктар Карэцкі, айцец Валянцін (Кас’янчук) і ягоная жонка Таццяна, старшыня Забалоццеўскага пасялковага савету Валерый Свіржэўскі, старшыня выканкаму Дзівінскага сельсавету Вера Пікула, дырэктар Дзівінскай дзіцячай школы мастацтваў Святлана Куцэвіч, менеджэрка праекту Наталля Кролік і ейная асістэнтка Алена Мезенцава.




 



Хочаце ведаць больш? Сачыце за нашымі публікацыямі ў Telegram і Facebook!